Ət və süd məhsullarına qarşı allergiya yaradan xəstəlik dünyaya yayılır
Yediyiniz ət və ya süd məhsullarından bir neçə saat sonra dərinizdə qaşınma, şişkinlik və ya qarın ağrısı kimi əlamətlər hiss edirsinizsə, bu sadə bir qida zəhərlənməsi deyil, "Alpha-gal sindromu" adlanan və getdikcə geniş yayılan allergik xəstəlik ola bilər.
Redaktor.az bu barədə xarici mediaya istinadla xəbər verir.
Mütəxəssislərin fikrincə, bu xəstəlik ABŞ-da başlayaraq artıq Avropa da daxil olmaqla 6 qitədə yayılıb. ABŞ Xəstəliklərə Nəzarət və Qarşısının Alınması Mərkəzinin (CDC) məlumatına görə, təkcə bu ölkədə 450 minə yaxın insanın bu sindromdan əziyyət çəkdiyi güman edilir.
"Alpha-gal" adlanan bir şəkər molekulu inək, donuz, dovşan və maral kimi məməlilərin bədənində mövcuddur. İnsan orqanizmində isə bu molekul olmur. Xüsusi kene növlərinin (məsələn, "yalnız ulduz kenesi") insanı sancması zamanı bu molekul bədənə keçir və immun sistem onu təhlükə kimi qəbul edərək antikor ifraz edir. Nəticədə ət və süd məhsulları yeyildikdə gecikmiş allergik reaksiya baş verir.
Əlamətlərə bunlar daxildir: Dəri səpkisi və güclü qaşınma, qarın ağrısı, ürəkbulanma, ishal, ağız və boğazda şişkinlik, anafilaktik şok (ağır və həyati təhlükəli reaksiya).
Bu simptomlar ət və süd məhsulları qəbulundan 2-6 saat sonra ortaya çıxa bilər və xəstəlik ilk dəfə kene sancmasından 1-3 ay sonra özünü göstərə bilər.
Xəstəliyin yayılma səbəbləri: Gənə sayının artması, insanların təbiətlə daha çox təmasda olması (piknik, kamp, yürüşlər), iqlim dəyişikliyi və maral-populyasiyasının çoxalması.
Alpha-gal sindromunun hazırda dəqiq müalicəsi yoxdur. Sadəcə, bu məhsullardan uzaq durmaq və yeni kene sancmalarından qorunmaq lazımdır. Şiddətli hallarda "EpiPen" adlı adrenalin iynəsi daşınması tövsiyə olunur. Zamanla bəzi insanlarda bu allergiya zəifləyə bilər.
Qarşısını almaq üçün: Uzunqol geyim və şalvar geyinin, təbiətdə olarkən bədəninizi mütəmadi yoxlayın, DEET tərkibli kene əleyhinə sprey istifadə edin, heyvanlarınızı da kene baxımından mütəmadi yoxlayın.
Əgər süd və ya ət məhsullarını qəbul etdikdən sonra gecikmiş allergik reaksiyalarla qarşılaşırsınızsa, həkimə müraciət edib alpha-gal sindromu testi etdirməyiniz tövsiyə olunur.
Nuriyyə NATİQQIZI
Bizi Telegram-da izləyin...
