107 yaşında da həyatından zövq alır - Uzunömürlülüyün sirri nədir?
Böyük Britaniya ilə İrlandiya arasında yerləşən Men adasının ən yaşlı sakini Cim Parks 107 yaşını qeyd edib.
Redaktor.az xəbər verir ki, bu barədə “Manx Radio” məlumat yayıb.
İrlandiya dənizində yerləşən Men adası Britaniya tacına bağlı özünüidarə edən ərazidir.
Port Erin şəhərindəki “Southlands” qocalar evində yaşayan Cim Parks doğum gününü ailəsi və dostları ilə birlikdə keçirib. O, uzun və xoşbəxt həyatının sirrinin daim hərəkətdə olmaq və gələcəyə maraq göstərmək olduğunu bildirib.
Parks 107 yaşına baxmayaraq, yavaşlamaq niyyətində olmadığını deyib. O, ad günü səhərinə ənənəvi gəzintisi ilə başlayıb.
1919-cu ildə Londonda anadan olan Parks 19 yaşında qaz sənayesində işləməyə başlayıb. İkinci Dünya müharibəsi zamanı Kral Hərbi Hava Qüvvələrində xidmət edib və 1946-cı ilə qədər burada qalıb.
Müharibədən sonra Joan adlı qadınla ailə həyatı qurub. Cütlük 60 ildən çox birlikdə yaşayıb, üç oğul, dörd nəvə və üç nəticə böyüdüb.
2015-ci ildə həyat yoldaşının vəfatından sonra Parks ailəsinə daha yaxın olmaq üçün Men adasına köçüb.
Nəşrin məlumatına görə, Cim Parks Men adasının tarixində ən yaşlı kişi hesab olunur.
Aytəkin TOFİQQIZI
Bizi Telegram-da izləyin...
