Meyxanaçılar niyə gənc yaşında ölür? - "Bu sənətdə sağlamlığı qorumaq çətindir"
Şair, ssenarist, meyxanaçı Pərviz Arifin Redaktor.az müsahibəsi:
- Pərviz bəy, necə bir mühitdə doğulub, boya-başa çatmısınız?
- Əgər valideynlərin ali təhsilli olmağı ziyalı ailə sayılırsa, ziyalı ailədə doğulmuşam. Sonra da ortastatistik azərbaycanlı kimi böyümüşəm.
- Sözə marağınız nə zamandan bəri var?
- Söz hər şeyin əvvəlidir, ilkidir. Sözə bağlılığım güman edirəm ki, fitrətdən olub. Özümükəşfim isə məktəb illərinə təsadüf edir.
- Cəmiyyətlə uyğunlaşmağı bacarırsınızmı?
- Cəmiyyəti onun qələm sahibləri, ictimai xadimləri formalaşdırır və ya formalaşdırmalıdır. Bizim "zamanla ayaqlaşmaq" prinsipimiz sadəcə mənəvi yüksəlişin qarşısını kəsir. Əsasən cəmiyyətin bizə uyğunlaşmasını təmin etmək lazımdır.
- İşiniz sözlədi, sözü üzə deməyi bacarırsınızmı?
- Söz dəyərli məfhumdur. Onu xəlvətdə israf etmək olmaz. Yerində və qaydasında deyilməyi arzuolunandır.
- Həm şair, həm ssenarist, həm də meyxanaçı - hansı sizə daha yaxındı?
- Zahirdə bu sahələr fərqli görünsə də, nəticədə hər birinin kökü sözdür. Məndə hər şey şairlikdən başladı və düşünürəm ki, şeir daha alidir.
- Meyxana ilə şeir camiası nə qədər eyni olsa da, bir o qədər də fərqlidi. Hər ikisinin içində olmaq sizi yormur? Necə idarə edirsiniz?
- Təbii ki, fərq yetərincədir. Bu fərqlilik isə özünü biixtiyar biruzə verir. Şairlərin çevrəsində meyxana mənim əlavə statusum, meyxanaçıların əhatəsində şairlik fərdi qazancımdır
- Bildiyimiz qədəri ilə “De gəlsin” verilişində də naliyyətləriniz olub. Yenidən elə bir veriliş olsa qatılarsınız?
- 2014-cü il "De gəlsin" yarışmasının qalibi olmuşam. Nə vaxtsa ondan daha titullu yarış olsa iştirak edərəm.
- Təəssüf ki, meyxanaçıların çoxu cavan yaşda vəfat edir. Bu haqda nə fikirləşirsiniz? Onlar səhhətlərinə yetərincə diqqət yetirmir?
- Allah dünyasını dəyişən bütün söz əhlinə rəhmət eləsin. Məni ən çox sarsıdan Vüqar Biləcərinin vəfatı oldu. Bu camiədə sağlamlığa nəzarət etmək çox çətindir. Ümumi rejimsizlik bütün xəstəliklərin baisidir.
- Hazırda nə ilə məşğulsunuz, gələcək planlarınız nədir?
- Toy mərasimlərinə qadağa qoyulduğu üçün meyxana fəaliyyəti bir qədər səngiyib. Şairlik ruh halına uyğun davam edir. Ssenarist olaraq hazırda dörd yumorstik serialda imzam var.
- Müsahibəyə görə təşəkkür edir.
- Mən də sizə ayırdığınız zamana görə təşəkkür edirəm.