Çətin və şərəfli yolla

Azərbaycan təhlükəsizlik xidməti yaradılmasının 104-cü ildönümünü qeyd edir. 28 Mart təhlükəsizlik orqanları əməkdaşlarının peşə bayramı günüdür. Ümummilli lider Heydər Əliyevin “Azərbaycan Respublikasının milli təhlükəsizlik orqanları əməkdaşlarının peşə bayramı gününün təsis edilməsi haqqında” 23 mart 1997-ci il tarixli sərəncamı ilə martın 28-i respublikamızda dövlət təhlükəsizliyi orqanlarının peşə bayramı günü elan olunmuşdur. Ötən dövrdə təhlükəsizlik orqanlarının yaranma tarixi və fəaliyyəti ilə bağlı tədqiqatlar aparılmış, bu mövzuda kitablar, məqalələr nəşr olunub.

Redaktor.az Azərbaycan təhlükəsizlik orqanlarının və Birinci Qarabağ müharibəsinin veteranı, fəxri əməkdaş, istefada olan polkovnik Elşad Qoca oğlu İsayevin müsahibəsini təqdim edir: 

– Söhbətimizə Azərbaycan təh­lükəsizlik orqanlarının yaranma ta­rixindən başlamaq istərdim. Bilirik ki, siz uzun illər təhlükəsizlik orqan­larımızın tarixi barədə araşdırmalar aparmısınız və neçə-neçə məqalənin, kitabların müəllifisiniz. İstərdim, bu barədə fikirlərinizi bölüşəsiniz...

– Şərəf və milli qürur tariximiz olan Azərbaycan Xalq Cümhuriyyəti (1918-1920) haqqında tanınmış alimlər, tarix­çilər tərəfindən xeyli sayda kitab, elmi araşdırmalar çap edilmiş, böyük maraq kəsb edən sənədli filmlər çəkilmişdir. Elə bu gün də həmin istiqamətdə mü­hüm işlər aparılır, elmi məqalələr yazılır. 

Ötən əsrin 80-90-cı illərində bəzi qə­zetlərdə az sayda, əsasən də, məlumat xarakterli məqalələr çap olunubmuşdur. Bu səbəbdən 1996-cı ildə Milli Təh­lükəsizlik Nazirliyində Azərbaycan Xalq Cümhuriyyətinin təhlükəsizlik orqanları­nın yaradılmasının və fəaliyyətinin daha geniş öyrənilməsi məqsədilə mütəxəs­sislərdən və nazirliyin əməkdaşlarından ibarət işçi qrupu yaradılmışdı. Mən də həmin qrupun üzvü idim. Nazirliyin rəh­bərliyi işçi qrupunun səmərəli fəaliyyəti üçün hər cür şərait yaratmışdı. Müxtə­lif dövlət arxivlərində, eyni zamanda, nazirliyin arxivində geniş tədqiqat işləri aparıldı, respublika qəzetlərində, jurnal­larda məqalələr dərc olundu, televiziya və radio verilişlərində çıxışlar edildi, kitablar yazıldı. Orqanın tarixini və fəa­liyyətini müəyyən qədər öyrənə bildik. Həmin materiallar ölkə rəhbərliyinə təq­dim edildi. Azərbaycan Respublikasının Prezidenti Heydər Əliyev 1997-ci il mar­tın 23-də Azərbaycan Respublikasının milli təhlükəsizlik orqanı əməkdaşlarının peşə bayramı gününün təsis edilməsi haqqında sərəncam imzaladı. Sərən­camda göstərilirdi ki, 1919-cu ildə Azər­baycan Demokratik Respublikası Hərbi Nazirliyinin Baş Qərargahının tərkibində ilk xüsusi xidmət orqanı olan kəşfiyyat və əks-kəşfiyyat bölməsinin yaradıldığı gün – 28 mart Azərbaycan Respubli­kasının milli təhlükəsizlik orqanı əmək­daşlarının peşə bayramı günü elan olunsun. Beləliklə, zəhmətimiz hədər getmədi. Nəticədə maraqlı eksponatları olan muzey yaradıldı, sonra bu muzey ulu öndərin adını daşıyan akademiya­mızın Şöhrət muzeyi ilə birləşdirildi. Araşdırmalar bu gün də davam etdirilir. Ümumilikdə, təhlükəsizlik orqanlarının fəaliyyətinin araşdırılması ilə əlaqədar altı kitabın müəllifiyəm. Bir neçə sənədli və çoxseriyalı televiziya filminin hazır­lanmasında iştirak etmişəm. İki cildlik Azərbaycan Xalq Cümhuriyyəti Ensik­lopediyasında təhlükəsizlik orqanlarının fəaliyyətinə həsr olunmuş məlumatların müəlliflərindən biri də mənəm. 

– Azərbaycan Xalq Cümhuriyyəti­nin təhlükəsizlik orqanlarının fəaliy­yətindən söz açmanızı istərdik... 

– 28 may 1918-ci ildə Azərbaycanın dövlət müstəqilliyi haqqında İstiqlal Bə­yannaməsinin qəbulundan sonra qısa müddət ərzində parlament fəaliyyətə başlamış, yeni hökumət təşkil olun­muşdu. Yeni hökumətin qarşısında çətin və mürəkkəb vəzifələr dururdu. İlk növbədə, ölkəni qoruya biləcək mil­li ordu təşkil edilməli, neft şəhəri Bakı bolşevik-daşnak və digər qüvvələrdən təmizlənməli, dövlətin təhlükəsizliyi təmin olunmalı idi. Daxili və xarici təh­didlərin, baş verə biləcək terror-təxribat aksiyalarının qarşısını almaq, pozucu qüvvələri zərərsizləşdirmək məqsədilə təhlükəsizlik orqanlarının yaradılması­na böyük ehtiyac yaranmışdı. Keçmiş çar ordusunun generalları Səməd bəy Mehmandarovun Hərbi nazir, Əliağa Şıxlinskinin nazir müavini, Məmməd bəy Sulkeviçin Baş Qərargah rəisi və­zifələrinə təyin olunması ölkədə gedən ordu quruculuğuna, eləcə də kəşfiyyat və əks-kəşfiyyat fəaliyyətinin formalaş­dırılmasına xüsusi təkan vermişdi. 

Azərbaycan hökuməti ölkənin təh­lükəsizliyinə birbaşa cavabdehlik da­şıyan yeni qurumun - kəşfiyyat və əks-kəşfiyyat bölməsinin Hərbi Nazir­liyin tərkibində yaradılmasını məqsə­dəuyğun sayırdı. Ümumiyyətlə, Azər­baycan Xalq Cümhuriyyəti dönəmində ölkənin təhlükəsizlik orqanları üç mər­hələdə fəaliyyət göstərmişdir. Birinci mərhələ 28 mart – 11 iyun 1919-cu ili əhatə edir. Bu mərhələdə kəşfiyyat və əks-kəşfiyyat bölməsi Baş Qərarga­hın General-kvartirmeyster idarəsinin tərkibində yaradılmışdı. Bölmənin rəisi vəzifəsinə Əfrasiyab bəy Ağalarov tə­yin olunmuşdu. Qeyd etmək lazımdır ki, xüsusi təhsil və bacarıq tələb edən sahədə peşəkar mütəxəssislər olmadı­ğından bölmənin əməkdaşları keçmiş çar ordusunun hərbçiləri arasından se­çilmişdi. 

Bölmənin əks-kəşfiyyatçıları, ilk növbədə, denikinçilərə, bolşevik və er­məni casuslarına qarşı mübarizə apa­rırdılar. Əldə olunmuş məlumatlar quru­mun əməliyyat fəaliyyətini aydınlığı ilə göstərir. Özü də bu məlumatlar ölkənin müxtəlif ərazilərini, hərbi birləşmələrin dislokasiya yerlərini əhatə edirdi. Dövlət arxivində onlarca əməliyyat məlumatı, aylıq smeta xərcləri, uğurlu əməliyyat tədbirlərində iştirak etmiş əməkdaşların mükafatlandırılması barədə rəhbərliyin ünvanına yazılmış çoxsaylı raportlar da saxlanılır. Maliyyə hesabatına əlavə olunmuş arayış xarakterli sənəddən ay­dın olur ki, kəşfiyyat və əks-kəşfiyyat bölməsinin rəisi Əfrasiyab Ağalarovun rəhbərliyi ilə xüsusi əməliyyat nəticəsin­də gənc ölkənin əleyhinə casusluq edən 16 nəfərdən ibarət qrup ifşa olunmuş­dur. Həbs edilənlər əsasən Azərbaycan Ordusunda xidmət edən denikinçi zabit­lər idi. Axtarış zamanı Azərbaycanda ic­timai-siyasi və iqtisadi vəziyyətlə bağlı, gizli bolşevik təşkilatının işi, Azərbay­can Ordusunun durumu barədə Denikin qərargahına ünvanlanmış çoxlu sayda agentura məlumatları tapılmışdı. 

Ordu quruculuğu axarına düşdükcə kəşfiyyat məsələlərinə də xüsusi diqqət yetirilirdi. Lakin bu istiqamətdə də kadr qıtlığı, peşəkar zabitlərin olmaması özü­nü göstərirdi. Hərbi topoqraf olan Məm­məd bəy Əliyev Tiflisdə Azərbaycan diplomatik missiyasında hərbi attaşe vəzifəsinə təyinat almışdı. Hərbi attaşe kimi işini vicdanla yerinə yetirən Məm­məd bəy kəşfiyyat işlərinə də cəlb edil­mişdi. Əməliyyat-müşahidə işlərindən tutmuş, əməliyyat-kəşfiyyat məlumatla­rının əldə edilməsinə qədər mürəkkəb tapşırıqlar yerinə yetirən polkovnik M.Ə­liyevin əldə etdiyi məlumatların böyük əhəmiyyəti vardı. Ermənistan qoşunları barədə məlumatların toplanılması üçün də ona Gürcüstan Ordusunun Baş Qə­rargahı ilə birlikdə gizli kəşfiyyat fəaliy­yətini təşkil etmək tapşırılmışdı. 

1919-cu ilin mayında Denikinin or­dusunun Petrovsk və Dərbəndi tutması, Azərbaycan və Gürcüstanın sərhədlə­rinə doğru irəliləməsi Bakıda vəziyyəti daha da kəskinləşdirmişdi. Azərbaycan hökuməti dövlətin müdafiəsi ilə məş­ğul olacaq yeni bir qurumun – Dövlət Müdafiə Komitəsinin yaradılması barə­də qərar qəbul etmiş və hərbi vəziyyət elan olunmuşdu. Ölkədə əks-kəşfiy­yat funksiyasını yerinə yetirə biləcək müstəqil xüsusi xidmət orqanının yara­dılmasına da ehtiyac vardı. Dəyişiklik nəticəsində kəşfiyyat fəaliyyəti Hərbi Nazirliyin tərkibində saxlanıldı. Həmçi­nin 11 iyun 1919-cu ildə sırf əks-kəşfiy­yat fəaliyyəti ilə məşğul olacaq yeni qu­rum – Əks-inqilabla Mübarizə Təşkilatı yaradıldı. Bu təşkilatın fəaliyyəti ikinci mərhələni, 11 iyun 1919 - 6 mart 1920-ci illəri əhatə edir. 

– Yeni təhlükəsizlik təşkilatının fəaliyyətindəki əsas fərqləndirici cəhətlərə aydınlıq gətirə bilərsiniz­mi?

– Əks-inqilabla Mübarizə Təşkilatı hökuməti, Dövlət Müdafiə Komitəsini ən mühüm informasiyalarla təmin etmə­li və ölkə ərazisində əks-kəşfiyyat işini həyata keçirməli idi. Yeni qurum öz fəa­liyyətini “Azərbaycan Xalq Cümhuriyyə­tinin əks-kəşfiyyat xidməti vəzifəlilərinin hüquq və vəzifələri haqqında” 22 mad­dədən ibarət olan əsasnaməyə uyğun qurmuşdu. Bakıda təşkilatın 8 ərazi böl­məsi yaradılmışdı. Bu bölmələrə Məm­mədtağı Dadaşov, Seyfulla Əzimzadə, Məmməd Hacızadə, Qasım İsmayılov, Aleksandr Şengeliya, Qəmbər Tahirov, Əbdüləziz Tağıyev və İslam Əliyev rəh­bərlik edirdilər. Senzura işlərinə Lavrenti Beriya, agentura işlərinə isə Aleksandr Qoberidze, sonra Allahverdi Sultanov cavabdeh idilər. 

Lakin qurumun fəaliyyətində ilk gün­lərdən etibarən müəyyən problemlər yaranmağa başlamışdı. Belə ki, “Hüm­mət”çi bolşeviklərin təzyiqi ilə məcburi olaraq əməkdaşların xidmətə qəbulun­da partiya prinsipi əsas götürülürdü. Belə ki, həmin prinsipə əsasən təşkila­tın əməkdaşlarının üçdə ikisi “Müsavat”, üçdə biri isə “Hümmət” partiyalarından olmalı idi. Eyni zamanda, təşkilatın rəhbərinin “Müsavat”dan, müavininin isə “Hümmət”dən təyin edilməsi nəzər­də tutulmuşdu. Hökumətin və Dövlət Müdafiə Komitəsinin sədri Nəsib bəy Yusifbəylinin sərəncamı ilə “Müsavat” Partiyasının üzvü, millət vəkili Məm­mədbağır bəy Şeyxzamanlı təşkilatın rəisi vəzifəsinə təyin olunmuşdu. Rəis müavini vəzifəsinə isə “Hümmət” Par­tiyasının üzvü Mirfəttah Musəvi təyin edilmişdi. Onun öldürülməsindən sonra isə bu vəzifəni Mahmud bəy Səfikürdski icra etməyə başladı. 

Təşkilatın ilk rəisi M.Şeyxzaman­lı 1919-cu ilin avqust aynın 20-də öz ərizəsinə əsasən vəzifədən azad edil­mişdi. O, fəaliyyətini millət vəkili kimi parlamentin aqrar komissiyasında da­vam etdirməyə başladı. Elə həmin gün onun qardaşı Nağı bəy Şeyxzamanlı şəxsi heyətə təqdim edilmişdi. 

Təşkilat fəaliyyət göstərdiyi müddət ərzində ölkə rəhbərliyini mühüm əhə­miyyətli məlumatlarla təmin etməyə çalışırdı. Xeyli sayda uğurlu əməliyyat tədbirləri həyata keçirilmişdi. Erməni casuslarına qarşı aparılan əməliyyat işlərindən biri olduqca maraqlıdır. Bakı­da erməni diplomatik missiyasının üzvü A.Sarkisovun casusluq fəaliyyəti müəy­yənləşdirilmiş və o, respublikadan çıxa­rılmışdı. 

Ancaq qurumun fəaliyyətində ciddi problemlər də vardı. “Hümmət”çi bolşe­viklər gizlincə öz partiyalarının tapşırıq­larını yerinə yetirir, faktiki olaraq ölkənin əleyhinə işləyirdilər. Ölkənin təhlükə­sizliyinə birbaşa cavabdeh olan xüsusi xidmət orqanı kimi strateji qurumda iki, bir-birinə zidd ideoloji cəbhədə dayan­mış əməkdaşların fəaliyyətinin nəticəsi nə ola bilərdi? Xidməti vəzifələrin yerinə yetirilməsi zamanı bəzən eyni təşkilatın nümayəndələri əqidələrinə görə üzbəüz gəlməyə məcbur olurdular. Göründüyü kimi, böyük ümidlərlə yaradılmış yeni təhlükəsizlik orqanı belə bir şəraitdə işi­ni davam etdirirdi. 

Nazirlər Şurasının 6 mart 1920-ci il tarixli iclasında Daxili işlər nazirinin çıxışı dinlənilmiş, təşkilatın əməkdaşları tərəfindən bolşevik Nikolay Çikalonun həbsi zamanı onun döyülməsi insiden­ti şişirdilmiş və bolşeviklərin təzyiqi ilə Əks-inqilabla Mübarizə Təşkilatının fəa­liyyəti dayandırılmışdır.

1920-ci ilin mart ayında qeydə alın­mış hadisələrlə, xüsusən Qarabağ bölgəsində ermənilərin silahlı qiyamı və Azərbaycan ərazisində bolşevik­lərin fəaliyyətinin intensivləşməsi ilə Əks-inqilabla Mübarizə Təşkilatının fəa­liyyətinin dayandırılmasının arasındakı əlaqə də danılmazdır. Sonradan min­lərlə dinc azərbaycanlını qətlə yetirən və zorakılığa məruz qoyan bolşeviklər öz tərəfdarları olan N.Çikalonun, guya, fiziki təzyiqlə üzləşməsi mövzusundakı spekulyasiyalarla ölkənin əks-kəşfiyyat qurumunun fəaliyyətini iflic edərək onun ləğvinə nail olmuş, ölkənin təhlükəsizlik sisteminə ciddi zərbə vurmuşlar. 

– Əks-inqilabla Mübarizə Təşkilatı fəaliyyətini dayandırdıqdan sonra bu funksiyanı hansı qurum həyata keçir­mişdir? 

– Qeyd etdiyiniz dövr təhlükəsizlik orqanlarının fəaliyyətinin üçüncü mər­hələsini – 6 mart – 28 aprel 1920-ci il tarixini əhatə edir. Azərbaycanın bolşe­vik Rusiyası tərəfindən işğalına iki aya yaxın vaxt qalmış ölkədə əks-kəşfiyyat təminatını İnformasiya şöbəsi adlı qu­rum yerinə yetirmişdir. Yeni qurum Na­zirlər Şurasının sədrinə və Daxili işlər nazirinə tabe idi. Əks-inqilabla Müba­rizə Təşkilatının texniki funksiyaları, o cümlədən təhqiqat, müşahidə, axtarış və s. İnformasiya şöbəsinə təhvil ve­rilmişdi. Şöbəyə rəhbərlik Ələkbər xan Şahsuvarova tapşırılmışdı. Ələkbər xan əvvəlki sələflərindən fərqli olaraq ali təhsilli hüquqşünas idi. O, Moskva Dövlət Universitetini bitirmişdi. Qurum­da azərbaycanlılarla yanaşı, Osmanlı türkləri, ukraynalılar, gürcülər və ruslar da xidmət edirdilər.

Ələkbər xan Şahsuvarov fəaliy­yətinin ilk günlərindən artıq yaxınlaş­maqda olan bolşevik təhlükəsinə qarşı yorulmadan və qətiyyətlə mübarizə aparmışdır. Az və çətin vaxtda bir sıra uğurlu əməliyyat tədbirləri həyata keçir­mişdir. Bolşeviklərin gizlətdikləri partla­yıcı maddələrin yerinin və Balaxanıda gizli iş aparan 22 nəfərin müəyyən edil­məsi, məşhur bolşevik Çurayevin həbsi ustalıqla hazırlanmış xüsusi əməliyyat tədbirləri nəticəsində mümkün olmuşdu. Qurum fəaliyyətini bolşevik Rusiyasının Azərbaycanı işğalı nəticəsində dayan­dırmaq məcburiyyətində qalmışdır. 

– Bəs təhlükəsizlik orqanlarının rəhbərlərinin sonrakı aqibəti necə ol­muşdur?

– 28 aprel 1920-ci ildə Azərbaycan Xalq Cümhuriyyəti bolşevik Rusiyası tərəfindən işğal edildikdən sonra res­publikanın rəhbərlərinə, tanınmış ziya­lılarına, dövlət xadimlərinə, hərbçilərə və təhlükəsizlik orqanlarının əməkdaş­larına qarşı əsl repressiya başlanmışdı. Müxtəlif vaxtlarda Azərbaycan təhlükə­sizlik orqanlarına rəhbərlik etmiş Əfra­siyab bəy Ağalarov, Məmmədbağır bəy Şeyxzamanlı və Ələkbər xan Şahsuva­rov müstəqil Azərbaycan Respublikası­na xidmət etdiklərinə görə sorğusuz-su­alsız güllələnmiş, bu orqanlarda işləmiş onlarca əməkdaşın bir qismi həbs edil­miş, bir qismi isə o cümlədən, Nağı bəy Şeyxzamanlı, Mahmud bəy Səfikürdski və digərləri mühacirətə getməyə məc­bur olmuşlar. 

Azərbaycan Xalq Cümhuriyyəti naminə çalışmış bu fədakar insanları unutmağa haqqımız yoxdur. Onların tarixi fəaliyyəti daha geniş araşdırılma­lı və istiqlal tariximizdə öz layiqli yerini tutmalıdır. Hamımız onları tanımağa və tanıtdırmağa borcluyuq.

– Dövlət Təhlükəsizliyi Xidmətinin hazırkı fəaliyyətini necə qiymətləndi­rirsiniz?

– Dövlət Təhlükəsizliyi Xidməti ölkə­nin əsas təhlükəsizlik strukturlarından biridir. Milli və dövlət maraqlarını hə­mişə üstün tutan qurumun gördüyü iş göz qabağındadır. Yüksək səviyyəli peşəkarlardan təşkil edilmiş DTX-nin şəxsi heyətinin fəaliyyəti cəmiyyət ara­sında rəğbət doğurur. Xalqımız Dövlət Təhlükəsizliyi Xidmətinə, onun rəisi general-polkovnik Əli Nağıyevə xüsusi inam, etimad göstərir. Bu, təhlükəsiz­lik orqanlarının veteranı kimi, məni də sevindirir. Uzun illər birlikdə çalışdığım, savadlarına, bacarıqlarına inandığım, vətənpərvər, gecə-gündüz Vətəni, xalqı göz bəbəyi kimi qoruyan çiyindaşları­ma, fədakar insanlara fəaliyyətlərində davamlı uğurlar arzulayıram.

Əlbəttə ki, Dövlət Təhlükəsizliyi Xid­mətinin son dövrlərdəki uğurlarından danışırıqsa, qurumun şəxsi heyətinin Vətən müharibəsində qazanılan Qələ­bəyə verdiyi töhfələri xüsusi qeyd etmə­liyik. Döyüş meydanında ardıcıl zəfər­lər qazanan Azərbaycan Ordusunun mühüm kəşfiyyat məlumatları ilə təmin olunmasında, o cümlədən düşmənin terror-təxribat planlarının və niyyətlə­rinin, kiberhücum cəhdlərinin və infor­masiya mübarizəsi çərçivəsində həyata keçirdiyi fəaliyyətin qarşısının alınma­sında Dövlət Təhlükəsizliyi Xidmətinin müstəsna rolu vardır.

Bununla yanaşı, Dövlət Təhlükə­sizliyi Xidmətinin xüsusi təyinatlılarının müharibə müddətində və ondan sonrakı dövrdə reallaşdırdığı uğurlu əməliyyat­lar da bu qurumun fəaliyyətinin ictimaiy­yətə bəlli olan kiçik bir hissəsidir. 

Göstərdikləri şücaətə görə müzəffər Ali Baş Komandan Prezident İlham Əli­yevin müvafiq sərəncamları ilə Dövlət Təhlükəsizliyi Xidmətinin xeyli sayda əməkdaşının yüksək adlara, orden və medallara layiq görülmələri şəxsi heyətə olan etimadın əyani təzahürüdür. 

– Dövlət Təhlükəsizliyi Xidmətin­də çalışan gənc əməkdaşlara nələri tövsiyə edərdiniz?

– Bu gün Dövlət Təhlükəsizliyi Xid­mətində çox sayda gənc kadr çalışır. Təbiidir, əməkdaşlar müəyyən yaş həd­dini keçdikdən sonra ehtiyata buraxılır. Onların yerinə daha savadlı, hazırlıqlı, xüsusi təhsil almış, bir neçə xarici dil bilən, müasir informasiya-kommunika­siya texnologiyaları sahəsi üzrə zəruri biliklərə yiyələnmiş, Vətənini, dövlətini sevən gənclər gəlir. Biz bunu İkinci Qa­rabağ müharibəsində də gördük. Bu, şəxsən məni sevindirir. Ancaq gənc­lərə öz tövsiyəmi də demək istəyirəm. Xalqın təkidli tələbi ilə siyasi hakimiy­yətə qayıdan ulu öndər Heydər Əliyev üç dəfə dövlət təhlükəsizliyi orqanları­nın əməkdaşları ilə görüşmüşdür. 

İlk görüş 1997-ci il iyun ayının 28-də milli təhlükəsizlik orqanları əməkdaşları­nın peşə bayramı gününün təsisinə həsr edilmiş təntənəli mərasimdə olmuşdur. 1999-cu il martın 27-də Azərbaycan milli təhlükəsizlik orqanlarının yaradıl­masının 80 illiyinə həsr edilmiş təntənəli yubiley tədbirində ikinci görüş olmuşdur. Sonuncu görüş isə 2000-ci il mayın 16-na təsadüf edir. Həmin gün Milli Təh­lükəsizlik Nazirliyinin İdman-Sağlamlıq Kompleksinin istifadəyə verilməsi ilə bağlı nazirliyin əməkdaşları ilə görüş keçirilmişdir. Hər üç görüşdə ulu öndər geniş nitq söyləmişdir. Böyük önəm da­şıyan bu tarixi nitqlərdə Heydər Əliyev təhlükəsizlik orqanlarının keçdiyi yol və qarşıda duran vəzifələr barədə da­nışmışdır. Çox istərdim ki, gənc əmək­daşlarımız bu tarixi nitqləri dərindən oxusunlar. Çünki həmin çıxışlarda son yüz ildə fəaliyyət göstərmiş təhlükəsizlik və dövlət orqanlarının işi, ictimai-siyasi vəziyyət böyük peşəkar tərəfindən təh­lil edilir. Bu gün də aktual olan o tarixi çıxışlar sanki təhlükəsizlik orqanlarının əməkdaşları üçün tərtib olunmuş xüsusi proqramdır. Məncə, ulu öndər Heydər Əliyevin nitqləri hər bir təhlükəsizlik orqanı əməkdaşının stolüstü kitabı ol­malı və dərindən öyrənilməlidir. 

– Bu gün Azərbaycan təhlükə­sizlik orqanlarının yaradılmasının 104-cü ildönümü qeyd olunur. Peşə bayramı ilə əlaqədar təbriklərinizi eşitmək xoş olardı...

– Azərbaycan təhlükəsizlik orqanla­rının bütün əməkdaşlarını, veteranlarını bu əlamətdar gün münasibətilə səmimi qəlbdən təbrik edir, hər birinə möhkəm cansağlığı və xoşbəxtlik arzulayır, Vətən yolunda çətin və məsuliyyətli fəaliyyət­lərində müvəffəqiyyətlər diləyirəm. Qə­tiyyətlə inanıram ki, ulu öndərin təhlükə­sizlik orqanlarında yaratdığı peşəkarlıq məktəbi gələcək nəsillər tərəfindən də uğurla davam etdirələcək, xalqımızın, dövlətimizin təhlükəsizliyi bundan sonra da etibarlı qorunacaqdır. 

Əziz həmkarlar, peşə bayramımız mübarək!

Müsahibəni apardı:
Samirə ABDULƏLİZADƏ