"Azərbaycan bununla bir daha Ermənistana nümayiş etdirdi ki, onun səbir kasası yoxdur"
"Aprel döyüşləri Azərbaycanın Ermənistan üzərində bir növ qələbəsi, psixoloji və siyasi üstünlüyü oldu. Bu isə növbəti müharibə üçün Azərbaycana bir açar rolunu oynadı. Bu döyüşlərdə Azərbaycan Ordusu qəhrəmanlıq nümayiş etdirdi və Ermənistan ordusunun otuz il ərzində formalaşdırdığı "qalib" mifi dağıtdı".
Bunu Redaktor.az-a açıqlamasında politoloq Məhəmməd Əsədullazadə deyib. Politoloq deyib ki, bu döyüşlə bir daha aydın oldu ki, Azərbaycan Ermənistan ordusundan üstün qüvvəyə malikdir:
"Təbii ki, Rusiyanın vasitəçiliyi ilə atəşkəs bərpa olundu, amma bir daha Ermənistanın ağır durumda olduğu özünü büruzə verdi. Məhz aprel döyüşlərindən sonra Serj Sarkisyan danışıqlara hazır və güzəştlərə də gedəcəyini vurğuladı. Yəni artıq Ermənistan tərəfi də gördü ki, Azərbaycan Ordusu çox güclüdür və istənilən hərbi əməliyyatı aparmaqla əraziləri azad edə bilər. Bu isə 2020-ci ildə 44 günlük Vətən müharibəsində isbat olundu. Aprel döyüşlərini bir növ Azərbaycan Ordusu üçün sınaq testi kimi də qiymətləndirmək olar. Azərbaycan bununla bir daha Ermənistana nümayiş etdirdi ki, onun səbir kasası yoxdur, danışıqlar prosesinin uzun müddətli davam etməsində maraqlı deyil və tezlikdə öz ərazi bütövlüyünü təmin edəcək".
Qeyd edək ki, bu gün 2016-cı il Şanlı aprel döyüşlərindən 9 il ötür.
Vasif ƏLİHÜSEYN
Bizi Telegram-da izləyin...
