Üç ölkənin ordusu niyə bir araya gəlib? - Hərbi ekspertdən AÇIQLAMA
""Birliyin Gücü - 2026" birgə hərbi təlimlərinin Azərbaycan, Türkiyə və Özbəkistan hərbi qulluqçularının iştirakı ilə keçirilməsi, məncə, hər üç ölkə arasında hərbi əməkdaşlığın yeni mərhələdə inkişaf etdiyini göstərən mühüm hadisədir. Bu təlimlərin əsas əhəmiyyəti ondan ibarətdir ki, Azərbaycan, Türkiyə və Özbəkistanın hərbi qulluqçuları birgə fəaliyyət göstərərək qarşılıqlı təcrübə mübadiləsi aparır, müxtəlif taktiki tapşırıqların icrası zamanı koordinasiya və qarşılıqlı fəaliyyət imkanlarını təkmilləşdirirlər".
Bu barədə Redaktor.az-a açıqlamasında hərbi ekspert Anar Şuşalı bildirdi. O əlavə etdi ki, müasir dövrdə hərbi əməkdaşlıq yalnız silah və texniki vasitələrin mübadiləsi ilə məhdudlaşmır:
"Burada şəxsi heyətin hazırlığı, komandanlıq və idarəetmə, rabitə, taktiki düşüncə və birgə fəaliyyət qabiliyyəti də mühüm rol oynayır.
Azərbaycanın Türkiyə və Özbəkistanla münasibətlərində hərbi əməkdaşlıq xüsusi yer tutur. Azərbaycan və Türkiyə arasında uzun illər ərzində formalaşmış hərbi əməkdaşlıq artıq geniş təcrübəyə malikdir. Özbəkistanla əlaqələrin son illərdə müxtəlif istiqamətlərdə, o cümlədən müdafiə və təhlükəsizlik sahəsində inkişaf etməsi isə bu əməkdaşlığın coğrafiyasını və imkanlarını daha da genişləndirir. “Birliyin Gücü – 2026” təlimlərinin müxtəlif əraziləri və fərqli şəraitləri əhatə etməsi də diqqət çəkən məqamlardandır. Belə təlimlər hərbi qulluqçuların müxtəlif coğrafi və taktiki şəraitlərdə fəaliyyət imkanlarının yoxlanılması baxımından əhəmiyyətlidir. Eyni zamanda, müxtəlif ölkələrin hərbi bölmələrinin birgə fəaliyyət göstərməsi onların bir-birinin taktiki yanaşmalarını daha yaxından öyrənməsinə şərait yaradır.
Burada digər vacib məqam da təcrübə mübadiləsidir. Hər bir ordunun özünəməxsus təcrübəsi, hazırlıq sistemi və taktiki yanaşmaları var. Bu təcrübələrin birgə təlimlər zamanı paylaşılması hərbi qulluqçuların peşəkarlığının artırılmasına və qarşılıqlı fəaliyyət mexanizmlərinin daha da təkmilləşdirilməsinə imkan verir. Azərbaycan Ordusunun son illərdə keçdiyi inkişaf yolu da bu baxımdan xüsusi qeyd edilməlidir. Müasir döyüş təcrübəsinə malik Azərbaycan Ordusu müxtəlif ölkələrin silahlı qüvvələri ilə keçirilən birgə təlimlərdə öz təcrübəsini bölüşməklə yanaşı, tərəfdaş orduların təcrübəsindən də yararlanır. Bu proses ordular arasında qarşılıqlı anlaşma və peşəkar əlaqələrin möhkəmlənməsinə xidmət edir.
Eyni zamanda, belə təlimlər üç ölkə arasında yalnız hərbi əlaqələrin deyil, ümumilikdə strateji tərəfdaşlığın inkişafını da nümayiş etdirir. Azərbaycan, Türkiyə və Özbəkistan arasında siyasi, iqtisadi, nəqliyyat, enerji, mədəni və digər sahələrdə əməkdaşlıq mövcuddur. Müdafiə sahəsində keçirilən birgə tədbirlər isə bu çoxşaxəli münasibətlərin mühüm istiqamətlərindən biridir".
Ekspertin sözlərinə görə, “Birliyin Gücü – 2026” adının özü də təlimlərin mahiyyətinə uyğundur:
"Burada əsas məsələ üç ölkənin hərbi qulluqçularının eyni məkanda bir araya gəlməsi ilə yanaşı, onların birgə fəaliyyət, qarşılıqlı etimad və təcrübə mübadiləsi imkanlarının genişləndirilməsidir. Ümumilikdə, bu cür təlimlər orduların hazırlıq səviyyəsinin artırılması, birgə fəaliyyət imkanlarının təkmilləşdirilməsi və Azərbaycan, Türkiyə və Özbəkistan arasında müdafiə sahəsində əməkdaşlığın praktiki müstəvidə inkişaf etdirilməsi baxımından əhəmiyyətlidir. Əsas nəticə isə ondan ibarətdir ki, hərbi əməkdaşlıq təcrübə paylaşdıqca, birgə fəaliyyət artdıqca və qarşılıqlı etimad möhkəmləndikcə daha sistemli xarakter alır".
NURİYYƏ
Bizi Telegram-da izləyin...
