"Azərbaycan bunu qəbul etmir və..." - QARABAĞLA BAĞLI AÇIQLAMA

 14:19 22.01.2021     9736

"Müharibədən sonra Ermənistanın Azərbaycana qarşı hərbi təcavüzünün nəticələrini aradan qaldırmaq məqsədilə birgə bəyanat qəbul olundu. Burada Ermənistan silahlı qüvvələrinin Azərbaycan ərazisindən tam çıxarılması nəzərdə tutulurdu. Bu müddəa sülhməramlı qüvvələrin nəzarətində qalan ərazilərə də aid edilirdi. Ermənistan indiyə qədər 10 noyabr Bəyanatının bu müddəasını tam şəkildə yerinə yetirməkdən boyun qaçırır".

Redaktor.az xəbər verir ki, bu sözləri sabiq Xarici İşlər naziri, politoloq Tofiq Zülfüqarov Rusiya XİN rəhbəri Sergey Lavrovun Ermənistan və Azərbaycan arasında dövlət sərhədində Laçın nəzarət-buraxılış məntəqəsi ilə bağlı açıqlamasına münasibət bildirərkən deyib. O bildirib ki, bəzi rəsmi şəxslər öz iştirakını ört-basdır etmək məqsədilə silahlı birləşmələri Ermənistanın nəzarətində olmayan birləşmələr kimi təqdim etməyə çalışırlar:

""Hərbi əsir" kateqoriyasına aidiyyəti olmayan saxlanılan şəxslərin qaytarılması problemi məhz bununla bağlıdır. Və həqiqətən də iki aylıq sülhdən sonra bu, nə hərbi əsirlərdir?

Hətta bu şəxslərin adi vətəndaşlar olduqlarını ehtimal etsək belə, o zaman Ermənistanın bu vətəndaşları Azərbaycan ərazisinə necə keçiblər, nəyə görə bizim xəbərimiz olmadan əcnəbi vətəndaşlar ərazimizə keçə bilirlər?

Hərəkətin azadlığı müvəqqəti əsaslarla və yalnız sülhməramlıların nəzarətində olan ərazilərdə yaşayan erməni milliyyətindən olan şəxslər üçün nəzərdə tutulur.

Rəsmi Moskva dövlət başçısı Putinin timsalında dəfələrlə etiraf edib ki, Dağlıq Qarabağ Azərbaycanın ayrılmaz tərkib hissəsidir. Bu isə o deməkdir ki, suveren hüquqlar, o cümlədən əcnəbi vətəndaşların sərhəddən hərəkətinə nəzarəti Azərbaycanın səlahiyyətli şəxsləri həyata keçirməlidir. Sülhməramlıların bu prosesdə müvəqqəti iştirakına yol verilə bilər, lakin bu və ya digər əcnəbi vətəndaşın buraxılması qərarını Azərbaycan qəbul edir.

Bununla əlaqədar Lavrova xatırlatmaq yerinə düşərdi ki, sülhə məcburetmə əməliyyatlarından fərqli olaraq, sülhün dəstəklənməsi əməliyyatları onu qəbul edən ölkənin hər hansı suveren hüququnun məhdudlaşdırılmasını nəzərdə tutmur”.

T.Zülfüqarov bildirib ki, Ermənistanın rəsmi şəxslərinin sülhməramlıların nəzarət zonasında yaşayan erməni əhalisinin reinteqrasiyası prosesində tərəf kimi iştirak etmək niyyətlərindən xəbər verən birtərəfli bəyanatları Azərbaycan qəbul etmir və bunu suveren ölkənin daxili işlərinə müdaxilə etmək cəhdi kimi qiymətləndirir:

“Sülhməramlı qüvvələr müşahidə missiyasını suveren Azərbaycan Respublikasının ərazisində həyata keçirdiklərinə görə Sülhün Dəstəklənməsi Qüvvələrinin və monitorinq həyata keçirən qüvvələrin mandatının işlənilməsi və qəbul olunmasında Ermənistan nümayəndələrinin iştirakı yolverilməzdir və Azərbaycan tərəfindən qətiyyətlə rədd olunur.

Sülhü Dəstəkləyən Qüvvələrin dövlətlərarası sərhədlərin bərpası işində iştirak etməsi amili bunun üçün əsas ola bilməz, çünki erməni tərəfində Rusiya hərbçilərinin olması sərhədlərin mühafizəsi haqqında ikitərəfli Rusiya-Ermənistan razılaşmaları ilə tənzimlənir.

Sülhün Dəstəklənməsi Qüvvələrinin və müşahidə missiyasının mandatı sülh prosesinin tərəfdaşları qismində dəvət olunan Türkiyə və Rusiyanın iştirakı ilə danışıqların gedişində hazırlanmalı və həmin qüvvələri öz suveren ərazisində qəbul edən Azərbaycanla müvafiq razılaşma memorandumunun imzalanması nəticəsində qəbul olunmalıdır”.

Mahir Xəttab \ Redaktor.az

Türkiyə ən müasir HMS-lər alır - S-400-dən sonra növbəti RAKET KOMPLEKSİ

 14:52 22.01.2021     3220

Türkiyə "Eurosam SAMP-T" havadan müdafiə sistemləri almaq üçün addımlar atır.

Redaktor.az xəbər verir ki, İtaliya və Fransanın ortaq istehsalı olan "SAMP-T" ən müasir müdafiə sistemlərindən biri sayılır.

Sözügedən qurğuların Türkiyə Silahlı Qüvvələrinin tərkibinə daxil olunması üçün artıq danışıqlara start verilib.

Qeyd olunub ki, 2018-ci ildə Türkiyə və Fransa prezidentlərinin görüşü zamanı bu məsələ müzakirə olunub, hətta ilkin razılığa gəlinib. Sonradan iki ölkə arasında yaranan diplomatik gərginlik prosesi təxirə salıb.

Türkiyənin gündəmində "SAMP-T" batareyasını birbaşa almaqla yanaşı, istehsala ortaq olmaq da var.

Orxan İsmayıl / Redaktor.az