Azərbaycan bu gecə Gorus-Qafan yolunda gömrük və sərhəd postları quracaq - AÇIQLAMA
Azərbaycan tərəfi bu gün gecə yarısı Gorus-Qafan yolunda gömrük postları yaradacaq.
Redaktor.az news.am-a istinadla xəbər verir ki, bunu Ermənistan Təhlükəsizlik Şurasının katibi Armen Qriqoryan İctimai Televiziyaya müsahibəsində deyib.
“Bu gün Azərbaycan tərəfi erməni tərəfinə məlumat verib ki, saat 00:00-dan etibarən Gorus-Qafan avtomobil yolunun hissələrində gömrük və sərhəd prosedurlarını həyata keçirəcək, yəni keçid məntəqəsi yaradacaq”, - Qriqoryan bildirib.
Onun sözlərinə görə, Ermənistan tərəfi qarşılıqlı addımlar atacaq, gömrük məntəqələri yaradacaq. O qeyd edib ki, artıq işlərə başlanılıb.
Təhlükəsizlik Şurasının katibi vurğulayıb ki, alternativ Qafan-Tatev yolu artıq hazırdır və bu yol vasitəsilə həm Gorusa, həm də İrəvana getmək olar. Bu o deməkdir ki, Ermənistanın həm avtomobillərin keçidi, həm də yüklərin daşınması üçün təhlükəsiz alternativi var.
Bundan əlavə, hazırda Şurnux, Vorotan və Çakatənə gedən icmadaxili yolların təmiri davam etdirilir.
T.İSMAYIL
Bizi Telegram-da izləyin...
