Azərbaycanlı deputat AŞPA-da nə deyib? - Erkin Qədirlinin müzakirələrə səbəb olan ÇIXIŞI

 23:13 30.04.2022     13488

Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü, deputat Erkin Qədirlinin qurumun 27 aprel 2022-ci il tarixli iclasındakı çıxışı ölkəmizdə ciddi müzakirələrə səbəb olub.

Böyük əksəriyyət millət vəkilinin AŞPA tribunasından Rusiyanın Ukraynada törətdiyi beynəlxalq cinayətləri dilə gətirdiyinə və Azərbaycanın mövqeyini ifadə etdiyinə görə onu təqdir edirsə, bir qrup rusiyapərəst bundan narazılığını ifadə edir, digər bir qrup isə deputatın əli cibində çıxış etməsinin etik olub-olmadığını müzakirə edir.

Redaktor.az millət vəkili Erkin Qədirlinin AŞPA-nın iclasındakı çıxışının tam mətnini təqdim edir:

"Cənab sədr, hörmətli həmkarlar, Ukrayna ərazisində müxtəlif beynəlxalq cinayətlər törədilir. Bəşəriyyətə qarşı cinayətlər, müharibə cinayətləri - Buça, İrpen və digər yerlərdən gələn xəbərlərə əsaslanaraq, bu cinayətlərin bəzilərinin soyqırım xarakterli olduğuna inanmaq üçün əsasların olduğunu söyləsək haqlı olarıq. Ancaq bütün bunlardan əlavə, xüsusi diqqətə layiq olan bir cinayət var və bu təcavüz cinayətidir.

Hörmətli həmkarlar, beynəlxalq cinayətlər iki kateqoriyaya bölünür - beynəlxalq hüquqa görə cinayətlər və beynəlxalq hüquqa qarşı cinayətlər. Beynəlxalq cinayətlərin böyük əksəriyyəti birinci qrupa aiddir. Bunlar müvafiq beynəlxalq müqavilələrlə təsbit edilir – terrorizm, müəyyən silahların qanunsuz istifadəsi, insan alveri, narkotiklərin qanunsuz dövriyyəsi və s. Bunlar beynəlxalq hüquqa görə cinayətlərdir. Təcavüz isə özünəməxsus cinayətdir. Bu, beynəlxalq hüquqa görə deyil, beynəlxalq hüquqa qarşı cinayətdir. O, beynəlxalq hüququn hüquqi fenomen kimi fundamental inkarına əsaslanır. Biri var ki, kimsə beynəlxalq hüququn səmərəsizliyindən məyus olur və biz hamımız beynəlxalq hüququn mükəmməllikdən uzaq olduğunu, əslində çox zəif olduğunu, çox vaxt güclü dövlətlər tərəfindən sui-istifadə edildiyini bilirik. Ancaq beynəlxalq hüququn hüquqi təbiətinin inkar edilməsi tam başqadır. Rus dilində “безнаказанность” sözü var. İngilis dilinə "cəzasızlıq" kimi tərcümə olunur. Düzgün tərcümədir, lakin burada mənanın bir hissəsi itir. Cəzasızlıq o deməkdir ki, ya qanunla nəzərdə tutulmuş cəza yoxdur, ya da qanunla nəzərdə tutulmuş cəza var, lakin kimsə ondan qaça bilir və ya hər hansısa səbəbə görə cəzadan kənar qalır.

Ayrıca olaraq, rus dilindəki “безнаказанность” sözü isə, hər hansı bir cəzanın prinsipcə ola bilməməsi anlamına gəlir. İstər qanunda, istər əxlaqda və hətta ictimai rəydə. Buna görə də biz rus siyasətçilərindən tez-tez “Varşavanı bombalayacağıq”, “tanklarımız yenidən Praqada olacaq”, “Berlin bizə yalvaracaq”, “Baltik ölkələri saxtadır”, “Ukrayna heç vaxt mövcud olmayıb” və s. eşidirik. Onlardan biri, Rusiya federal parlamentinin aşağı palatasının, dövlət dumasının deputatı Mixail Delyagin, daha da irəliyə gedərək, “Rusiya Azərbaycana qarşı taktiki nüvə silahından istifadə edə bilər” və hətta “istifadə etməlidir” deyib. Bilirsiniz niyə? Çünki Azərbaycan Ukraynaya humanitar yardım edir. Bu sözlər bu qədər asan başa gəlməməlidir. Biz beynəlxalq hüququn, onun hüquqi təbiətinin inkar edildiyi mərhələdəyik".

T.İSMAYIL