Ermənistan hakimiyyəti iki böyük gücün arasında qalıb - Politoloq

 11:56 06.09.2022     178

"Ermənistan hakimiyyəti iki böyük gücün – Rusiya və ABŞ arasında qalıb. Bunu Ermənistan rəsmilərinin səfər trayektoriyasından da müəyyənləşdirmək olar. Deməli, Ermənistan xarici işlər naziri Ararat Mirzoyan bu gün Moskvaya gedib. Rusiyanın xarici işlər naziri Sergey Lavrov erməni həmkarını hüzuruna çağırıb". 

Redaktor.az xəbər verir ki, bu fikri politoloq Elxan Şahinoğlu Ermənistanın xarici işlər naziri Ararat Mirzoyanın Moskvaya səfərini sosial şəbəkədə şərh edərkən qeyd edib. 

Onun sözlərinə görə, Lavrov Mirzoyandan liderlərin Brüssel görüşünün detallı hesabatını istəyəcək:

"Ermənistanın müdafiə naziri Suren Papkiyan isə bugün əks istiqamətə - ABŞ-a gedib. Onu da Pentaqona çağırıblar. Görünür amerikalılar da İrəvanın Rusiya ilə hərbi əməkdaşlığın səviyyəsini öyrənmək istəyirlər. Üstəgəl Qarabağ separatçılarının “xarici işlər naziri” David Babayanı da Konqresdə gözləyirlər. İki gün sonra isə baş nazir Nikol Paşinyan Kreml sahibi Vladimir Putinin hüzurunda olacaq. Paşinyan Putinlə birgə iqtisadi forumda iştirak edəcək".

E.Şahinoğlu onu da əlavə etdi ki, İrəvan həm Moskvaya, həm də onun qatı düşməni Vaşinqtona hesabat verir:

"Aydındır ki, Paşinyan və hökuməti Rusiyanın ağalığından imtina edə bilmirlər, asılıdırlar, ancaq Vaşinqtonun da şirnikləndirici təkliflərindən vaz keçmirlər. Vaşinqton Ermənistanın Rusiyadan tam imtina edə bilməyəcəyini anlayışla qarşılayır, Kremlin isə bu məsələdə mövqeyi qətidir: “Mənim yanımda olmalısan”".

İLTİFAT