ABŞ-dan Bakı və İrəvana ÇAĞIRIŞ
Birləşmiş Ştatlar Laçın dəhlizinin açılmasına çağırıb.
Redaktor.az xarici mediaya istinadla xəbər verir ki, belə bir bəyanatla ABŞ-ın ATƏT-dəki səfiri Maykl Karpenter ATƏT Daimi Şurasının xüsusi iclasında çıxış edib.
“Biz Azərbaycan və Rusiyanı Laçın dəhlizi ilə hər iki istiqamətdə insanların, nəqliyyat vasitələrinin və yüklərin təhlükəsiz hərəkəti üçün fasiləsiz hərəkəti dərhal bərpa etməyə çağırırıq" - o, bildirib.
"ATƏT və onun müxtəlif təsisatları təhlükəsizliyə hərtərəfli yanaşmamıza və dəyərlərimizə, prinsiplərimizə və öhdəliklərimizə əsaslanaraq Ermənistan və Azərbaycana kömək etmək üçün yaxşı mövqedədirlər. Bizim bu münaqişədə istifadə edilə bilən alətlərimizin geniş spektri var və biz bunu necə edə biləcəyimizi müzakirə etməliyik”, - ABŞ-ın ATƏT-dəki səfiri bildirib.
O əlavə edib ki, ABŞ Azərbaycan və Ermənistanı mübahisələrini həll etmək üçün mənalı danışıqları bərpa etməyə çağırır.
“Ətraflı Sülh Sazişi münasibətlərin normallaşmasına və qarşılıqlı tanınmaya əsaslanan davamlı sülhə aparan yeganə doğru yoldur. Biz həmçinin Azərbaycan və Ermənistanı iddia edilən vəhşilikləri araşdırmağa və günahkarları məsuliyyətə cəlb etməyə çağırırıq”, - Maykl Karpenter bildirib.
ABŞ-ın ATƏT-dəki səfiri əlavə edib ki, ABŞ bu münaqişənin hərtərəfli və davamlı həllinə nail olmaq üçün Avropa İttifaqı, ATƏT və beynəlxalq təşkilatlar kimi tərəfdaşlar vasitəsilə Azərbaycan və Ermənistanla həm ikitərəfli, həm də çoxtərəfli şəkildə işləməyə davam edəcək.
Turan İSMAYIL
Bizi Telegram-da izləyin...
