Ukraynalı deputatlar Bakıda bir sıra görüş keçirdi - FOTO
Ukrayna Ali Radasında Azərbaycan Respublikası ilə parlamentlərarası dostluq qrupunun üzvlərindən ibarət nümayəndə heyəti Bakıda rəsmi səfərdədir.
Redaktor.az xəbər verir ki, nümayəndə heyətinə parlamentlərarası dostluq qrupunun sədri Volodımır Kreydenko, millət vəkilləri Mikola Qaluşko və Anton Şvaçko, habelə Ukrayna Azərbaycanlıları Birləşmiş Diasporunun sədri Hikmət Cavadov daxildir.
Bu gün qonaqların Ukraynanın Azərbaycandakı səfiri Vladislav Kanevski ilə keçirdikləri görüş zamanı parlament diplomatiyası, Ukrayna – Azərbaycan ikitərəfli əməkdaşlığının daha da dərinləşməsi məsələləri müzakirə olunub.
Bundan sonra Ukrayna parlamentinin nümayəndələri xarici işlər nazirinin müavini Xələf Xələfov tərəfindən qəbul olunublar. XİN rəsmisi Azərbaycanın Ukraynanın ərazi bütövlüyünü dəstəklədiyini, Ukrayna xalqına humanitar dəstək də göstərdiyini vurğulayıb. Bununla yanaşı, dostluq qrupunun rəhbəri Volodımır Kreydenko da azərbaycanlı millət vəkiləri və Azərbaycan hökuməti üzvlərini yaxın vaxtda Ukraynaya səfərə dəvət etdiyini diqqətə çatdıraraq Ukraynanın da Azərbaycanın ərazi bütövlüyünü daim dəstəklədiyini, göstərilən humanitar yardımlara görə də minnətdar olduğunu bildirib. Görüşdə həmçinin Milli Məclisdə Ukrayna ilə parlamentlərarası dostluq qrupunun sədri Rüfət Quliyev və Urayna səfiri Vladislav Kanevski də iştirak edib.
Daha sonra Ukrayna nümayəndə heyəti Azərbaycan rəqəmsal inkişaf və nəqliyyat nazirinin müavini Rəhman Hümbətovla görüşüb. Söhbət zamanı iki ölkə arasında nəqliyyat, logistika, infrastruktur sahələrində qarşılıqlı faydalı əməkdaşlıq məsələləri müzakirə olunub.
Səfərin növbəti gün proqramında da iki ölkənin rifahına yönələn qarşılıqlı dəstəyə əsaslanan ikitərəfli layihələrin həyata keçirilməsi məqsədi daşıyan bir sıra mühüm görüşlər nəzərdə tutulur.
Tunar Altunbay
Bizi Telegram-da izləyin...
