"Hacı Şahinin qəbrini ziyarət üçün xüsusi turların təşkilinə ehtiyac yoxdur" - Deputat
Son günlər Azərbaycan cəmiyyətində Hacı Şahin Həsənlinin dəfnindəki qələbəlik, onun cəmiyyət arasında nüfuzunun yüksək olması geniş müzakirə olunmaqdadır. Eyni zamanda, onun qəbrinin ziyarətgaha çevriləcəyi və bura turların təşkil ediləcəyi barədə məlumatlar da müzakirələrə səbəb olub.
Mövzu ilə bağlı Redaktor.az-a açıqlama verən Milli Məclisin deputatı Ceyhun Məmmədov qeyd etdi ki, Hacı Şahinin cəmiyyətin müxtəlif təbəqələrinin nüfuzunu qazanmasının səbəblərindən biri onun əksər din xadimlərindən və bu sahədə çalışan insanlardan fərqli olaraq əlçatanlığı, sadəliyi və daima insanlar arasında olmasıdır:
"O, davamlı olaraq Bakıda və bölgələrdə Vətən müharibəsi şəhidlərinin dəfn və yas mərasimlərində iştirak edirdi. Sosial şəbəkələrdə olduqca fəal idi. Son günlər müzakirə olunan Hacı Şahinin qəbrinin ziyarətgaha çevrilməsi məsələsinə gəldikdə isə qeyd etmək lazımdır ki, dinimiz dini şəxsiyyətlərə pərəstişdə ifratda varmağın qəti əleyhinədir. İnsanların hər hansı şəxsə ehtiramla yanaşması normaldır. Ancaq bu onların müqəddəsləşdirilməsinə və bütləşdirilməsinə aparıb çıxarmamalıdır.
Eyni zamanda, deputat hesab edir ki, Hacı Şahinin qəbrinin ziyarətgaha çevriləcəyi və bura turların təşkil ediləcəyi ilə bağlı açıqlamalar həm də siyasi məqsəd daşıyır.
"Bu fikirlər məqsədli şəkildə dövriyyəyə bir sıra dairələr tərəfindən buraxılır. Dəfn yeri məlumdur, insanlar sərbəst şəkildə onun qəbrini ziyarət edə bilərlər. Bunun üçün xüsusi turların təşkilinə ehtiyac yoxdur. Görünən odur ki, din sahəsində fəallıq bir müddət davam edəcək. Cərəyan edən proseslər ciddi təhlil olunmalı və operativ qərarlar qəbul edilməlidir. Proseslərin yalnız kənardan izlənilməsi sonrakı mərhələdə proseslərin idarə olunmasında ciddi çətinliklər yaradacaq", - deyə Ceyhun Məmmədov narahatlığını ifadə edib.
Turan İSMAYIL
Bizi Telegram-da izləyin...
