"Axı Dağlıq Qarabağ Ermənistana birləşdirilibsə, o zaman indi kimdən müstəqil olur?" - Paşinyandan jurnalistə tərs sual
Azərbaycanın 86,6 min kvadrat kilometr ərazisinə Dağlıq Qarabağ da daxildir.
Redaktor.az "Sputnik Armenia"ya istinadla xəbər verir ki, bunu bu gün keçirdiyi mətbuat konfransında Ermənistanın Baş naziri Nikol Paşinyan 86,6 min kvadrat kilometr ərazisi olan Azərbaycan ərazisinə nəyin daxil olması ilə bağlı sualı cavablandırarkən deyib.
Bundan əvvəl Avropa Şurasının Reykyavikdə keçirilən sammitində çıxış edən Nikol Paşinyan Azərbaycanın 86,6 min kvadrat kilometr ərazisi daxilində ərazi bütövlüyünü tanıdığını bəyan edib.
Mətbuat konfransı zamanı Ermənistan Respublikası hökumətinin Dağlıq Qarabağı Azərbaycanın tərkib hissəsi kimi tanıyıb-tanımaması ilə bağlı aydınlaşdırıcı sualı cavablandıran Paşinyan qeyd edib ki, ölkənin bütün hökumətləri Azərbaycanın ərazi bütövlüyünü tanıyıb.
“Və əgər Azərbaycanla mən bir-birimizi düzgün başa düşürüksə, İrəvan Azərbaycanın ərazi bütövlüyünü müəyyən edilmiş sərhədlər daxilində, Bakı isə 29 800 kvadrat kilometr daxilində Ermənistanın ərazi bütövlüyünü tanıyır”, - deyə o bildirib.
Ermənistan hökumətinin başçısı vurğulayıb ki, Qarabağ ermənilərinin hüquqları və təhlükəsizliyi məsələsi Xankəndi ilə Bakı arasında müzakirə edilməlidir və beynəlxalq təminat lazımdır. Eyni zamanda, o, belə olmadığı təqdirdə "Dağlıq Qarabağ" əhalisinin etnik təmizləməyə məruz qala biləcəyindən ehtiyat edir.
“Bizim üçün bu siyasətin davam etməyəcəyinə dair təminatların olması vacibdir”, - deyə baş nazir yekunlaşdırıb.
Baş nazirə xatırladılıb ki, Ermənistan Ali Şurasının qərarı ilə onun "Dağlıq Qarabağ"ı Azərbaycanın tərkib hissəsi kimi tanıyan sənədi imzalamaq hüququ yoxdur və sonradan bu qərar əsasında Ermənistan Konstitusiyası hazırlanıb.
Paşinyan isə cavabında qısa tarixi ekskursiya etməyə məcbur olduğunu bildirib. O xatırladıb ki, 1989-cu ildə Ermənistan Ali Soveti və Dağlıq Qarabağ Regional Şurası Ermənistanın və Dağlıq Qarabağın birləşdirilməsi haqqında qərar qəbul edib.
"1990-cı ildə Ermənistan Müstəqillik Bəyannaməsini qəbul edərək, digər məsələlərlə yanaşı, yuxarıda qeyd olunan qərara istinad etdi.
Daha sonra 1991-ci ildə Dağlıq Qarabağ öz müstəqilliyini elan etdi. Sual yaranır - kimdən müstəqillik? Əgər Ermənistandandırsa, bu, yuxarıda qeyd olunan birgə qərarın pozulması deyilmi? Əgər pozulubsa, niyə günahkarlar məsuliyyətə cəlb edilmir? Əgər Azərbaycandan müstəqillik elan olunubsa, yenə də bu, Ali Şura ilə Vilayət Şurasının birgə qərarını pozmurmu? Axı Dağlıq Qarabağ Ermənistana birləşdirilibsə, o zaman Dağlıq Qarabağ indi kimdən müstəqil olur?", - deyə Paşinyan bildirib.
Turan İSMAYIL
Bizi Telegram-da izləyin...
