"9 noyabr sənədində üçüncü dövlətlərin iştirakı nəzərdə tutulmayıb" - Mirzoyan dəhlizdən DANIŞDI
"Ermənistan dəhlizin bir hissəsi ilə bağlı nə 9 noyabr sənədinə, nə də digərlərinə görə heç bir öhdəlik götürməyib".
Redaktor.az news.am-a istinadən xəbər verir ki, bunu Ermənistanın xarici işlər naziri Ararat Mirzoyan bu gün keçirdiyi mətbuat konfransında deyib.
Nazir bəyan edib ki, Ermənistan regionda təkcə Naxçıvan-Azərbaycan marşrutu üzrə deyil, Ermənistanın da istifadə etmək niyyətində olduğu bütün marşrutlar üzrə kommunikasiyaların açılmasına hazırdır və maraqlıdır.
Nazir blokun açılmasına dair bərabərlik və suverenlik prinsiplərinə əsaslanan sazişin mövcud olduğunu vurğulayıb.
"Azərbaycanda bu, Əliyevin sözlərindən aydın görünür, onlar bu prinsiplərə qarşı deyillər, amma Naxçıvan marşrutu məsələsində də belə deyil".
Mirzoyan iddia edib ki, Azərbaycan Prezidenti İlham Əliyevin səsləndirdiyi hər üç tələb Ermənistan Respublikasının suverenliyinin pozulmasıdır. Onun sözlərinə görə, gömrükdən nə vətəndaşlara, nə də yüklərə azad keçid ideyasının özü qəbuledilməzdir.
Erməni nazir iddia edib ki, 9 noyabr sənədində üçüncü dövlətlərin iştirakı nəzərdə tutulmayıb, əksinə, birbaşa qeyd olunub ki, marşrutda təhlükəsizliyi Ermənistan Respublikası təmin edir.
Noyabrın 9-da sənəddəki imzanın ləğv edilməsinin mümkünlüyündən danışan Mirzoyan yenə iddia edib ki, Ermənistan digər iki tərəfdən fərqli olaraq hər zaman öz öhdəliklərini yerinə yetirib.
Turan İSMAYIL
Bizi Telegram-da izləyin...
