"İlham Əliyev Azərbaycanı Fələstin məsələsində günahlandırmaq istəyənlərə çox dəqiq cavab verdi"

"Azərbaycan-Misir münasibətləri tarixi keçmişə malikdir. Biz Misirlə istər İslam Əməkdaşlıq Konfransı çərçivəsində, istər Birləşmiş Millətlər Təşkilatı (BMT), Qoşulmama Hərəkatı və bütövlükdə dünyanın beynəlxalq platformalarında sıx iş birliyinə malikik".

Bu barədə Redaktor.az-a açıqlamasında Milli Məclisin deputatı Ceyhun Məmmədov Azərbaycan Prezidenti İlham Əliyevin Misirə səfərini şərh edərkən bildirdi.

Millət vəkli qeyd etdi ki, Misirlə Azərbaycan əlaqələri 1990-cı illərin əvvəllərindən başlayıb:

"Misir Azərbaycanın müstəqilliyini tanıyan ilk dövlətlərdən biridir. 1994-cü ildə ulu öndər Heydər Əliyev Misirə səfər edərək bir çox mühüm görüşlər keçirmiş və həmin görüşdə hər iki ölkə üçün önəmli sənədlər imzalanmışdı.

Sonrakı dövrlərdə hər iki ölkə prezidentləri qarşılıqlı səfərlər ediblər. 2007-ci ildə cənab prezidentin Misirə səfəri baş tutmuşdu. Bu səfər də olduqca mühüm xarakter daşıyırdı. Eyni zamanda biz xatırlayırıq ki, bir il öncə Misir Prezidentinin də Azərbaycana səfəri baş tutmuşdu.

Azərbaycan prezidentinin Misirə baş tutan səfəri onu göstərir ki, gələcəkdə də yüksələn dinamika ilə bu münasibətlər inkişaf edəcək. Bu da bizim əlaqələrimizin genişlənməsində öz tövhəsini verəcək".

Ceyhun Məmmədov bildirdi ki, Misir bütün platformalarda Azərbaycanın mövqeyini dəstəkləyib. Onun sözlərinə görə, Misirlə bir çox sahələrdə sıx əməkdaşlığımız var:

"Hər iki ölkənin çox böyük potensialı var. Hər iki ölkə müsəlman ölkəsidir. Hər iki ölkənin ortaq dəyərləri var. Bu da bizə daha da güclü olmağa, daha da inkişaf etməyə imkan yaradacaq.

Səfər zamanı Azərbaycanla Misir arasında ikitərəfli siyasi əlaqələr, eləcə də ölkələrimizin beynəlxalq təşkilatlar çərçivəsində əməkdaşlığı yüksək qiymətləndirildi. Görüşdə Misirin COP27-ə, Azərbaycanın isə COP29-a sədirlik etməsi vurğulandı və ölkələrimiz arasında bu sahədə əməkdaşlıq və təcrübə mübadiləsinin aparılması qeyd olundu. Bundan başqa iki ölkə arasında enerji, tikinti, sənaye, əczaçılıq, nəqliyyat və digər sahələrdə əməkdaşlıq məsələləri müzakirə olundu".

Deputat Azərbaycan Prezidentinin Misirdə İsrail-Fələstin münasibətləri ilə bağlı açıqlamasına da toxundu. 

"Cənab prezident Azərbaycanı Fələstin məsələsində günahlandırmaq istəyənlərə çox dəqiq və konkret cavab verdi. Bildiyimiz kimi bir neçə gün əvvəl Türkiyədə SOCAR-ın binasına hücum olmuşdu. Müxtəlif platformalarda Azərbaycanın ünvanına müəyyən fikirlər səsləndirilirdi ki, guya Azərbaycan Fələstinlə bağlı məsələdə biganədi. Əslində bu, tamamilə bizə qarşı irəli sürülən əsassız iddihamdır. Azərbaycan İsraillə bərabər Fələstinlə əlaqələrini gücləndirir. Buna baxmayaraq cənab prezident bir çox müsəlman liderlərindən fərqli olaraq Fələstində baş verənləri bir faciə kimi qiymətləndirdi. Orada baş verənlərin dayandırılmasının vacibliyini vurğuladı", - deyən Ceyhun Məmmədov əlavə etdi ki, İlham Əliyevin bu səfərdə toxunduğu mühüm məqamlardan biri də Azərbaycan-Ermənistan münasibətləri oldu:

"Prezident İlham Əliyev Ermənistan və Azərbaycan arasında sülhün əldə olunmasında çox böyük yolun qət edildiyini bildirdi. Ölkə başçısı Qazaxın dörd kəndinin geri qaytarılması, sərhədlərin delimitasiyası və demarlasiyasında uğurun əldə olunmasını xüsusi qeyd etdi. Azad olunmuş torpaqlarda görülən işlər, abadlıq-quruculuq işləri xüsusi qeyd edildi".

Yusif SƏMƏDZADƏ