Rusiya İrəvanın NATO sammitində iştirakına təəssüfləndi
İrəvanın NATO-nun Vaşinqtonda keçirilən sammitində iştirakı Moskvada böyük kədər yaradır.
Redaktor.az xəbər verir ki, bu barədə Rusiya Xarici İşlər nazirinin müavini Mixail Qaluzin bildirib.
“Bu hərbi-siyasi blokun Vaşinqtonda keçirilən sammitində iştirak etməklə yanaşı, Ermənistan NATO və ya alyansın ayrı-ayrı üzvləri ilə, xüsusilə NATO standartlarının həyata keçirilməsi, silahların alınması və ya birgə hərbi əməliyyatların aparılması ilə bağlı qarşılıqlı fəaliyyəti artırmağa üstünlük verir. Bütün bunlar həddindən artıq təəssüfdən başqa heç nəyə səbəb ola bilməz”, - Qaluzin qeyd edib.
Diplomat əlavə edib ki, məqsədi “Rusiyanın strateji məğlubiyyəti” olan Ermənistanın alyansla əməkdaşlığının dərinləşdirilməsi Cənubi Qafqazda vəziyyətin sabitliyini pozmaq təhlükəsi daşıyır. O, həmçinin İrəvanın belə addımlarını ehtiyatsızlıq adlandırıb.
Eyni zamanda, Xarici İşlər Nazirliyinin nümayəndəsi Ermənistanın Kollektiv Təhlükəsizlik Müqaviləsi Təşkilatının (KTMT) üzvü olaraq qaldığını xatırladıb. O, həmçinin qeyd edib ki, İrəvan hərbi və hərbi-texniki sahədə çoxsaylı sazişlərdə iştirak edib.
Sevinc İBRAHİMZADƏ
Bizi Telegram-da izləyin...
