"Kipr NATO-ya üzv ola bilməz" - AÇIQLAMA
Xəbər verdiyimiz kimi, Kipr NATO-ya daxil olmağı planlaşdırır. Bu, ada prezidenti Nikos Xristodulidisin oktyabrın sonunda Amerika lideri Co Baydenlə görüşündə diqqət mərkəzində olub.
Bəs Kipr həqiqətən də NATO-ya üzv olarsa, bu Türkiyə ilə münasibətlərə necə təsir edə bilər?
Mövzu ilə əlaqədar Redaktor.az-a danışan politoloq Abutalıb Səmədov bildirdi ki, Kiprin NATO-ya üzv olması mümkün deyil.
"Kiprin NATO-ya üzv olması ən azı iki səbəbdən mümkün deyil. Birincisi, bu dövlətin ərazi problemləri var. Uzun illərdir onu həll eləmək mümkünsüz olub. Bu səbəbdən Kiprin NATO-ya üzv olması mümkünsüzdür. Çünki ərazi problemləri olan dövlətləri NATO-ya üzv qəbul eləmirlər. İkinci mühüm səbəb bundan ibarətdir ki, NATO-ya üzvlüyə qəbul konsensusdan olur. Yəni bir dövlətin etiraz etdiyi halda, həmin namizəd ölkə NATO üzvlüyünə qəbul edilmir".
Politoloqun sözlərinə görə, Türkiyə heç vaxt Kiprin NATO-nun üzvü olmasına imkan verməz.
"Kiprin NATO-ya üzv olmaq şansı ən azı yaxın illərdə yoxdur. Ancaq əgər üzv olsa da, Türkiyə üçün nə problem yaratmalıdır? Çünki Yunanıstan da NATO-nun üzvüdür. Üstəlik, ABŞ və Fransa ilə ayrıca hərbi sahədə əməkdaşlıq haqqında müqavilələri də var. Ancaq müəyyən xoşagəlməz bəyanatlardan və addımlardan o tərəfə keçə bilmirlər. Baxmayaraq ki, Yunanıstan bütövlükdə ABŞ-nin hərbi bazasına çevrilib. Bu səbəbdən mən hesab edirəm ki, Kipr hətta NATO-ya üzvü olsa da, Türkiyə üçün heç bir problem yarada bilməz. Ancaq bir daha təkrar etmək istəyirəm ki, yaxın illərdə Kiprin Alyansa qəbul olunması ehtimalı yoxdur".
Türkan İSGƏNDƏRLİ
Bizi Telegram-da izləyin...
