"Azərbaycan Davos Forumunda liderlik nümunəsi göstərir" - Deputat
"Azərbaycanın uzun illərdir fəal şəkildə qatıldığı beynəlxalq tədbirlər sırasında Davos İqtisadi Forumu mühüm əhəmiyyət kəsb edir. Bu il 55-ci dəfə təşkil olunan Forumda qlobal iqtisadi problemlər geniş müzakirə olunur, müxtəlif panel iclaslar keçirilir. Nüfuzu yüksək olan Davos Forumu, burada aparılan müzakirələrə böyük diqqət cəlb edir".
Bu fikirləri Redaktor.az-a Milli Məclisin İqtisadi siyasət, sənaye və sahibkarlıq komitəsinin üzvü, deputat Aydın Hüseynov Davos Forumunun əhəmiyyətini şərh edərkən dedi. Millət vəkilinin sözlərinə görə, Azərbaycan Davos Forumunda yüksək nüfuza malikdir:
"Ölkəmizin etibarlı tərəfdaş kimi tanınması nəticəsində 2013-cü ilin 12 aprelində Dünya İqtisadi Forumunun bir iclası Bakıda təşkil edilib. Davos Forumunun Bakıda keçirilməsi Azərbaycanın iqtisadi və siyasi uğurlarının təsdiqi kimi dəyərləndirilir. İlk dəfə olaraq Forumun Qafqaz və Mərkəzi Asiya regionunda keçirilməsi, Azərbaycanın bölgədəki əhəmiyyətinin göstəricisi olmuşdur. Azərbaycanla Davos Forumu arasında tərəfdaşlığın nəticəsi olaraq, Dördüncü Sənaye İnqilabı Şəbəkəsinin Azərbaycan Mərkəzi fəaliyyətə başlayıb. Bu mərkəz müasir texnologiyalara əsaslanan sürətli inkişaf, regional rəqəmsal əməkdaşlıq və rəqabətqabiliyyətli insan kapitalının inkişafına əhəmiyyətli töhfələr verir".
Millət vəkili dünyada Azərbaycana xüsusi marağın olduğunu bildirdi.
"Cənubi Qafqazda lider mövqeyə malik Azərbaycan hər il sosial-iqtisadi, siyasi, enerji, nəqliyyat və digər sahələrdə yeni uğurlar qazanır ki, bu da beynəlxalq arenada ölkəmizə olan marağın artmasına səbəb olur. Bu da Prezident İlham Əliyevin uğurlu siyasətinin nəticəsidir.
Hazırda keçirilən 55-ci Davos Forumu çərçivəsində Prezident İlham Əliyevin aparıcı şirkət rəhbərləri ilə keçirdiyi görüşlər və hökumət üzvləri ilə apardığı siyasi müzakirələr, Azərbaycanın qlobal səviyyədə etibarlı tərəfdaş və qüdrətli dövlət olduğunu bir daha sübut edir", - deyə Aydın Hüseynov vurğuladı.
Türkan İSGƏNDƏRLİ
Bizi Telegram-da izləyin...
