"Özünə hörmət edən şəxs açıqlama verər"
Son dövrlərdə Azərbaycanın keçmiş məmurlarına, xüsusilə də Rusiyanın “5-ci kolonu” ilə əlaqələndirilən şəxslərə qarşı ittihamlar səsləndirilir. Onlar bu barədə açıqlama verməkdən boyun qaçırıblar.
Redaktor.az xəbər verir ki, mövzu ilə bağlı politoloq Elxan Şahinoğlu sosial media hesabında onları tənqid edib:
"Rusiyanın “5-ci kolonu”na bağlı adları hallandırılan keçmiş məmurların adi danışıq qabiliyyətləri də yoxdur. Ramiz Mehdiyev yazılanlara “axmaq-axmaq söhbətlər yayırlar, bunların hamısı yalandır”, keçmiş xarici işlər naziri Elmar Məmmədyarov “kimlərinsə qarnı ağrıyır”, keçmiş mədəniyyət naziri Əbülfəs Qarayev isə “Bakıda deyiləm, açıqlama verə bilmirəm”, deyərək reaksiya bildiriblər. Bunlardan biri də onlara ünvanlanan ittihamlara geniş şəkildə şifahi və ya yazılı açıqlama yayımlamayıb".
Politoloq həmin şəxslərin açıqlama verməli olduqlarını qeyd edib.
"Adlarınız Azərbaycanın sərnişin təyyarəsini raketlə vuran, vətəndaşlarımızı öldürən və ölkəmizə qarşı qara təbliğat aparan Rusiyaya bağlı şəbəkəylə əlaqəli hallanır. Özünə hörmət edən şəxs özünü təqsirli bilmirsə və deməyə sözü varsa, dərhal geniş müsahibə verər, mətbuat konfransı keçirər, ya bunları da bacarmırsa, mediaya yazılı cavabını göndərər. Həmin şəxs bütün bunları etmirsə, demək Rusiyanın şəbəkəsinə bağlılığı haqqında yazılanlara şübhə yeri qoymur".
Türkan İSGƏNDƏRLİ
Bizi Telegram-da izləyin...
