"Dünyanın bir çox ölkələri Azərbaycanın təcrübəsindən öyrənirlər" - Vitse-spiker
"Tarixən Balkan yarımadası “qoca qitə” olan Avropanın mərkəzi, “göbəyi” sayılıb. Avropa, Asiya və Afrikanın qovşağında yerləşdiyindən belə hesab ediblər ki, Balkanlarda nüfuz qazanan dövlət bu regionda strateji üstünlüklər də əldə edir. Son illərdə cənab Prezidentimiz İlham Əliyevin liderliyində Balkan ölkələri ilə əməkdaşlığın genişləndirilməsi ikitərəfli münasibətlər çərçivəsini aşır, daha geniş məna daşıyır. Şimali Makedoniya Respublikasının Prezidenti Qordana Silyanovska-Davkovanın ölkəmizə rəsmi səfəri həm də bu baxımdan əhəmiyyətlidir".
Redaktor.az xəbər verir ki, bunu Milli Məclis sədrinin müavini Musa Qasımlı Şimali Makdeoniya liderinin ölkəmizə səfərini şərh edərkən deyib.
"Cənab Prezidentimizin mediaya bəyanatında söylədiyi fikirlər ikitərəfli münasibətlərin mövcud vəziyyətini və perspektivlərini göstərir. Hər şeydən əvvəl, iki ölkə energetika sahəsində əməkdaşlığa başlayıb. Azərbaycan qazı artıq Şimali Makedoniyanın bazarına çatdırılıb. Avropa Azərbaycan təbii qazına möhtacdır.
Əvvəllər müxtəlif beynəlxalq təşkilatlarda işləmiş və fəaliyyətində mədəniyyət diplomatiyasının gücünə inanan Şimali Makedoniyanın Prezidenti Qordana Silyanovska-Davkovanın “ölkəniz müsəlman Şərqində ilk cümhuriyyət qurmuşdur, eləcə də ilk opera, ilk filarmoniya məhz burada yaradılmışdır. Bu ölkə öz zəngin mədəniyyəti ilə seçilir” - deməsi dünya mədəniyyəti quran millətimizin zəngin, qədim tarixi və mədəni irsinə, Azərbaycanın beynəlxalq məsələlərdə çox fəal olmasının vurğulanması isə dünya işlərində cənab Prezidentimizin fəaliyyətinə verilən qiymətdir.
Şimali Makedoniya Prezidentinin söylədiyi belə bir fikir Azərbaycan dövlətinin nailiyyətlərinin dünya üçün nə qədər əhəmiyyətli olduğunu göstərir: “...sizin nailiyyətləriniz sayəsində biz gələcək əməkdaşlığımızı davam etdirə bilərik.”
Səfər sübut etdi ki, dünyanın bir çox ölkələri Azərbaycanın təcrübəsindən öyrənirlər. Bu isə dövlətlərin və xalqların həyatında liderin necə vacib rol oynamasının nümunəsidir", - deyə vitse-spiker bildirib.
Turan İSMAYIL
Bizi Telegram-da izləyin...
