Trampın Azərbaycanla bağlı qərarı ölkəmizə ciddi təsir göstərməyəcək - AÇIQLAMA
ABŞ Prezidenti Donald Tramp dünya ölkələrinə qarşılıqlı tariflərlə bağlı Fərman imzalayıb. Tariflərin tətbiq olunduğu ölkələr arasında Azərbaycan da var. Ölkəmiz üçün minimal 10 % həcmində gömrük rüsumu müəyyən edilib.
Tranpın bu qərarı Azərbaycana hansı təsirləri göstərə bilər?
Mövzu ilə bağlı Redaktor.az-a açıqlamasında politoloq Sultan Şahidov bildirdi ki, fərmana görə, fərqli ölkələr fərqli tariflərə məruz qalacaqlar:
"Məsələn, ən çox tarifə məruz qalan ölkə Çin olacaqdır. Avropa İttifaqına qarşı 20 faizlik tariflər tətbiq edilib. Azərbaycan, Ukrayna kimi ölkələrə isə 10 faizlik tariflər tətbiq edilib. Qeyd edək ki, Azərbaycan və ABŞ arasında ticarət dövriyyəsi ötən ilin məlumatlarına əsasən təxminən bir milyard yeddi yüz milyon dollar civarındadır. Bunun əsas hissəsini ABŞ-dən gətirilən mallar təşkil edir. Azərbaycandan ABŞ-yə ixrac olunan mallar o qədər də çox deyil. Azərbaycan ixracatında ABŞ-nin payı təxminən 0,5 faizdir. Əsasən toxuculuq, xalça məhsulları, şərabçılıq məmulatları, o cümlədən kimyəvi məhsullar daxildir".
Politoloqun sözlərinə görə, 10 faizlik gömrük rüsumlarının tətbiqi halında, azərbaycanlı ixracatçılar ya həmin məhsulların qiymətini artırmalı olacaqlar, çünki avtomatik olaraq əlavə 10 faiz gömrük rüsumu ödəməli olacaqlar.
"Bu da eyni zamanda məhsulların ABŞ bazarında rəqabətinə təsir göstərə bilər. Həmin məhsullar daha baha satıldığına görə daha az alına bilər. Belə halda, azərbaycanlı ixracatçılar fərqli bazarlara, fərqli regionlara üz tuta bilərlər. Bu, sözsüz ki, iki ölkə arasındakı ticarətə təsirsiz ötüşməyəcək. Xüsusilə, Azərbaycandan ABŞ-yə olunan ixracatın kəmiyyətinə mənfi təsir göstərə bilər. Amma bu, eyni zamanda ciddi bir itki, zərər anlamına gəlmir. Qeyd etdiyim kimi, ABŞ Azərbaycanın ixracatında elə də önəmli rol oynamır və belə olduqda, azərbaycanlı sahibkarlar fərqli ölkələrə, regionlara üz tuta bilərlər. Düşünürəm ki, bu da ölkəmizin iqtisadiyyatına elə bir ciddi təsir göstərməyəcəkdir", - deyə S.Şahidov bildirdi.
Aytəkin TOFİQQIZI
Bizi Telegram-da izləyin...
