"Rusiya-Ukrayna münaqişəsi tezliklə həll olunmayacaq" - ŞƏRH
Ukrayna Prezidenti Volodimir Zelenski açıqlamasında bildirib ki, ordunun əhəmiyyətli dərəcədə kiçildilməsi ölkəsi üçün "qırmızı xətt"dir. Ukrayna üçün digər "qırmızı xətt" isə Rusiyanın işğalı altındakı ərazilərin Rusiya ərazisi kimi tanınmasıdır. O, bəyan edib ki, bu ərazilər Ukrayna ərazisidir.
Bəs Rusiya-Ukrayna arasında atəşkəs əldə olunarsa, ərazi mövzusu necə tənzimlənə bilər?
Mövzu ilə bağlı Redaktor.az-a danışan politoloq Sədrəddin Soltan bildirdi ki, Ukrayna ilə Rusiya arasında atəşkəs rejiminin tətbiq olunması üçün tələblər var:
"Bunlardan biri silahlı qüvvələrin sayının azaldılmasıdır ki, regionda gərginlik üçün bu başlıca təhdid sayılır. Digəri isə Rusiyanın işğal etdiyi ərazilərin gələcəkdə tanınması məsələsidir. Beynəlxalq ictimaiyyət hələ də həmin əraziləri işğal, sonra ilhaq etdiyi kimi qəbul edir. Fikrimcə, həmin ərazilər müvəqqəti olaraq Rusiyanın nəzarəti altında olacaq. Əsas məsələ atəşkəsə əməl edilməsi və insan ölümünün qarşısının alınmasıdır. Bu səbəbdən ərazilərin statusu, ərazilərlə bağlı məsələ, orada yaşayan insanların vətəndaşlıq məsələsi və sair bunun kimi proseslər atəşkəsdən sonrakı dövrə qalacaq".
Politoloq qeyd etdi ki, məsələnin tezliklə həlli çətindir.
"Hesab edirəm ki, Rusiyanın ərazisinin böyüməsini beynəlxalq ictimaiyyət asanlıqla qəbul etməyəcək və ya ümumiyyətlə qəbul etməyəcək. Digər tərəfdən Ukraynanın NATO və Avropa Birliyinə üzvlük məsələsi də sual altındadır. Daha çox Ukraynanın NATO-ya üzv olmayacağına dair Qərb rəsmiləri ismarışlar verir. Odur ki, atəşkəsdən sonra əsas məsələ ərazilərdə quruculuğun aparılması, yeni təmas xəttinin yaradılması və sərhədlərin möhkəmlənməsi prosesi başlayacaq. İlhaq olunmuş torpaqların taleyi isə gələcəyə qalacaq. Rusiya həmin torpaqlarda tam səlahiyyətlə iş apara bilməyəcək. Çünki o ərazilər işğal və ilhaq olunub. Həmin torpaqlarla bağlı məsələ beynəlxalq ictimaiyyətlə, eləcə də Ukrayna və Rusiya arasında atəşkəsdən sonrakı dövr üçün danışıqların başlıca mövzularından olacaq", - deyə S.Soltan bildirdi.
Aytəkin TOFİQQIZI
Bizi Telegram-da izləyin...
