"Azərbaycana qarşı ikili yanaşma həm idmanda, həm siyasətdə görünür” - Deputat Avropanın ədalətsizliyindən DANIŞDI
"Prezident İlham Əliyev Avropa çempionatında komanda hesabında çempion olan güləşçiləri qəbul edib. Azərbaycan Prezidentinin çıxışında diqqəti çəkən məqamlardan bir də, Avropa yarışlarında Azərbaycan idmançılarına qarşı ədalətsizliyin müşahidə olunmasıdır".
Bunu Redaktor.az-a açıqlamasında Milli Məclisin deputatı Vüqar Bayramov bildirdi.
Onun sözlərinə görə, ikili yanaşma yalnız idmanda deyil, eləcə də siyasətdə də müşahidə olunur:
"Bu yaxınlarda Avropa Parlamentində müzakirəyə çıxarılmış “Ermənistanda demokratik dayanıqlığın dəstəklənməsi” adlı qətnamə layihəsi nominal olaraq Ermənistana dəstək kimi təqdim olunsa da, bir sıra bəndlər birbaşa Azərbaycana qarşı əsassız ittiham və tələblər ehtiva edir. Yəni, Qərbdə bəzi dairələr hər imkanda Azərbaycana qarşı qərəzlərini nümayiş etdirməyə çalışırlar.Təbii ki, Avropada Azərbaycanın dostları da az deyil. Ölkəmizə olan son yüksək səviyyəli səfərlər bunu bir daha təsdiq edir. Amma qitənin enerji təhlükəsizliyində xüsusi paya malik olan, son illər TAP kəməri vasitəsi ilə Avropaya 57 milyard kub metrdən çox qaz nəql edən Azərbaycana qarşı bir sıra dairələrin qərəzli və ikili standardlara əsaslanan yanaşması təəssüf ki, bitmək bilmir".
Millət vəkili əlavə etdi ki, bütün bunlara baxmayaraq, Azərbaycan idmanda, siyasət və iqtisadiyyatda da güclənir, öz inkişaf yolunu müəyyənləşdirir.
Xədicə BAXIŞLI
Bizi Telegram-da izləyin...
