“Rusiyanın NATO-ya qarşı nüvə silahından istifadə ehtimalı çox aşağıdır” - General
Rəsmi Moskva NATO-ya diplomatik nota göndərib. Bildirilib ki, alyans Kalininqrad vilayətini Rusiyanın əsas ərazisindən təcrid etməyə cəhd göstərsə, nüvə silahından istifadə oluna bilər.
Bəs Rusiyanın nüvə silahından istifadə etməsi nə qədər real hesab olunur?
Mövzu ilə bağlı Redaktor.az-a danışan Türkiyənin Azərbaycandakı keçmiş hərbi attaşesi, ehtiyatda olan general Yücel Karauz bildirdi ki, Rusiya sentyabrın 30-da NATO-ya göndərdiyi qeyri-rəsmi diplomatik sənəddə Kalininqrad vilayətinin əsas ərazidən təcrid olunması cəhdini nüvə silahı da daxil olmaqla bütün arsenalın tətbiqi üçün əsas sayıb:
"Bu, 2022-ci ildən bəri təkrarlanan ritorikanın ilk dəfə alyansın özünə yazılı şəkildə çatdırılmasıdır. Mesajın ünvanı Baltik dənizi deyil, Qərbin qərarvermə mərkəzləridir. Moskva anklav ətrafındakı hərbi fəallığın Rusiya üçün ekzistensial hədd kimi oxunmasını istəyir. Kalininqrad Polşa ilə Litva arasında sıxılmış, Baltik donanmasının və nüvə daşıya bilən “İsgəndər” komplekslərinin yerləşdiyi anklavdır. Quru əlaqəsi Belarus və Suvalki dəhlizi üzərindən keçir. Rusiya hərbi doktrinasında ərazi bütövlüyünə təhdid nüvə variantının şərtlərindən biri kimi yazılıb, buna görə nota hüquqi və siyasi baxımdan Kreml üçün ardıcıldır. Lakin sənəd əmr deyil, çəkindirmə alətidir. NATO cavabında ittifaqın müdafiə xarakterli olduğunu, təlimlərin Rusiya ərazisinə təhdid yaratmadığını və nüvə ritorikasının məsuliyyətsiz sayıldığını bildirib. Alyansın sülh şəraitində, öz təşəbbüsü ilə anklavı hava və dəniz blokadasına alması ehtimalı aşağıdır: belə addım müharibə aktı sayılar və 5-ci maddəni işə salar. Əsas risk blokadanın elanı yox, təlimlər, infrastrukturun mühafizəsi və hibrid insidentlər üzərindən yığılan yanlış oxunmadır".
Ekspert qeyd etdi ki, 2022-ci ildən bəri Moskva nüvə siqnalını dəfələrlə verib, həddi isə keçməyib:
"Sülh və indiki gərginlik səviyyəsində NATO-ya qarşı nüvə tətbiqi çox aşağı ehtimallıdır. Açıq hərbi toqquşma və anklavın real kəsilməsi ssenarisində məhdud taktiki siqnal ehtimalı yüksəlir; tammiqyaslı mübadilə isə ABŞ nüvə çətiri və qarşılıqlı məhv məntiqi səbəbindən ən az ağlabatan nəticə olaraq qalır".
Onun sözlərinə görə, notanın funksiyası müharibə elan etmək deyil, Kalininqrad ətrafında hərbi addımın qiymətini siyasi olaraq bahalaşdırmaqdır:
"Qərb bu hədəni astananı endirən alət kimi qəbul etməməklə, Moskva isə “qaynar başlar”a sənəd göstərməklə eyni çəkindirmə oyununu oynayır. Cənubi Qafqaz və Xəzər kontekstində dərs budur: nüvə ritorikası birbaşa zərbədən çox qonşu teatrlarda manevr sahəsini daraltmaq və riskli addımları əvvəlcədən bahalı göstərmək üçündür. Sabitlik real blokada planından yox, insidentin qəsdən böyüdülməsinin qarşısının alınmasından asılıdır".
Xədicə BAXIŞLI
Bizi Telegram-da izləyin...
