Türkiyədə Azərbaycana qarşı ritorika: Rəsmi Ankara susmamalıdır
“Son günlər Türkiyədə Azərbaycanın ünvanına səsləndirilən tənqidlər, dini-siyasi çağırışlar və bəzi rəsmi şəxslərin mübahisəli açıqlamaları şübhəsiz ki, təəssüf doğurur. Xüsusilə məktəbli geyim qaydaları ilə bağlı müzakirələrin Azərbaycan əleyhinə siyasi ritorikaya çevrilməsi heç bir halda başa düşülən deyil. Oktyabrın 13-də Yeni Azərbaycan Partiyasının Türkiyədəki hakim Ədalət və İnkişaf Partiyasının bəzi nümayəndələrinin açıqlamalarına etiraz etməsi də məsələnin artıq ayrı-ayrı sosial şəbəkə paylaşımları ilə məhdudlaşmadığını göstərir”.
Bu fikirləri Redaktor.az-a açıqlamasında politoloq Yusif Bağırzadə bildirdi. O vurğuladı ki, Türkiyədə hər kəsin Azərbaycanla bağlı məsələlərə eyni mövqedən yanaşmasını gözləmək mümkün deyil:
“Fərqli fikirlərin olması təbiidir. Lakin tənqid faktlara əsaslanmalı, başqa dövlətin suverenliyinə hörmət çərçivəsində aparılmalıdır. Həssas dini məsələlərin siyasi təzyiq vasitəsinə çevrilməsi, Azərbaycanın dövlətçilik modelinin hədəfə alınması və ölkənin xarici siyasətinə dair ittihamların yayılması qardaşlıq və tərəfdaşlıq münasibətlərinə xidmət etmir. Xüsusilə rəsmi vəzifə tutan şəxslərin açıqlamaları daha böyük məsuliyyət tələb edir. Siyasi nüfuzu olan şəxslərin bəyanatları ictimai rəyə təsir göstərir və cəmiyyətdə müəyyən mövqelərin legitimləşdirilməsi kimi qəbul oluna bilər. Buna görə də belə açıqlamalar zamanı faktların dəqiqliyi, diplomatik həssaslıq və qarşılıqlı hörmət prinsipləri qorunmalıdır. Başa düşmək lazımdır ki, qarşılıqlı etimadı zədələyən ritorikanın yayılması qəbuledilməz nəticələr doğura bilər”.
Politoloq diqqətə çatdırdı ki, bu kontekstdə rəsmi Ankaranın mövqeyi xüsusi əhəmiyyət daşıyır. Onun sözlərinə görə, Türkiyə Prezident Administrasiyasının Dezinformasiya ilə Mübarizə Mərkəzi oktyabrın 9-da iki ölkənin münasibətlərini hədəfə alan manipulyativ məzmunlarla bağlı açıqlama yayıb.
“Türkiyə hakimiyyətinin nümayəndələri də fikir ayrılıqlarının dialoq yolu ilə həll edilməsinin vacibliyini vurğulayıblar. Bununla belə, ictimai etimadın qorunması üçün ümumi bəyanatlarla yanaşı, konkret hallara münasibətdə də ardıcıl və məsuliyyətli yanaşma vacibdir. Bu səbəbdən rəsmi Ankaranı Azərbaycan əleyhinə əsassız ittihamların və qarşıdurma ritorikasının qarşısının alınmasına, dövlət rəsmilərinin daha məsuliyyətli davranmasına və ictimai müzakirələrin faktlar əsasında aparılmasına töhfə verməyə çağırmaq əsaslıdır. Burada məqsəd tənqidi susdurmaq deyil, tənqidin siyasi manipulyasiyaya çevrilməsinin qarşısını almaqdır.
Ümumiyyətlə, Azərbaycan-Türkiyə münasibətləri ayrı-ayrı şəxslərin bəyanatlarından və müvəqqəti fikir ayrılıqlarından daha möhkəm tarixi, siyasi və mənəvi təməllərə söykənir. Bu gün əsas vəzifə ayrı-ayrı dairələrin yaratdığı gərginliyin xalqlar arasında etimadı zədələməsinə imkan verməməkdir. Azərbaycan və Türkiyə arasında qardaşlıq münasibətlərinin qorunması qarşılıqlı hörmət, məsuliyyət və səmimi dialoq tələb edir. Heç bir siyasi mübahisə iki xalqın tarixi yaxınlığını və ortaq gələcək naminə əməkdaşlığını kölgədə qoymamalıdır”, - deyə Y.Bağırzadə fikrini yekunlaşdırdı.
NURİYYƏ
Bizi Telegram-da izləyin...
