Türkiyəni təhlükə gözləyir? - Ərdoğanın nüvə silahı açıqlamasının ilginc tərəfləri...

 15:30 06.09.2019     945

“Regional şərtlər Türkiyənin nüvə silahına yiyələnməsi aktuallığını artırır”.

Redaktor.az bildirir ki, “Atlas” Araşdırmalar Mərkəzi Türkiyə Prezidenti Rəcəb Tayyib Ərdoğanın ölkəsinin nüvə silahına sahib olmasının mümkünlüyü ilə bağlı son açıqlamasını təhlil edib. Təhlildə bildirilib ki, Ərdoğan nüvə silahı mövzusunda ilk dəfədir açıqlama verir:

“Bunun bir neçə səbəbi var. Birincisi, ABŞ İranla nüvə anlaşmasından çıxdıqdan sonra Tehran yenidən uranın zənginləşdirilməsinə başlayıb. İran hazırda uranı 20 faiz zənginləşdirib. Məlumdur ki, nüvə silahı əldə etmək üçün uranı 80-90 faiz zənginləşdirmək lazımdır. Aydındır ki, İranın imkanları uranı bu rəqəmlərə qədər zənginləşdirməyə imkan verir. Bunun üçün İranın lazımi infrastrukturu və elmi potensialı var. Bundan başqa, İranın nüvə başlıqlarını daşıya biləcək raketləri də var və yeniləri sınaqdan keçirilir”.

Təhlildə vurğulanıb ki, İran Türkiyənin qonşusudur:

“Doğrudur, iki dövlət arasında münasibətlər normaldır, ancaq sabah şərtlərin dəyişməyəcəyindən heç kim sığortalanmayıb. İsrailin də keçmiş illərdə Türkiyə ilə yaxşı münasibətləri var idi. İndi bu iki dövlət arasında keçmiş illərdəki yaxşı münasibətlərdən əsər-əlamət qalmayıb. İranın nüvə silahını əldə etməsinə yaxınlaşması Türkiyənin də nüvə silahına yiyələnməsinə marağını artıracaq.

İkincisi, adını çəkdiyimiz İsrailin də nüvə silahı var. İsrail rəsmiləri bu haqda heç zaman açıqlama vermirlər. Ancaq hamı bilir ki, İsrailin kifayət qədər nüvə silahı var. Türkiyənin yaxınlığında olan dövlətlərdən Pakistanın və Hindistanın da nüvə silahı var”.

Təhlildə qeyd edilib ki, bölgədə nüvə silahı olan dövlətlərin sayı artır:

“İrana, İsrailə, Pakistana və Hindistana nüvə silahı ona görə lazımdır ki, heç bir dövlət onunla müharibəyə başlamağa, torpaqlarının işğalına risk etməsin. Məsələn, Ukrayna 1994-cü ildə Budapeştdə Rusiyanın xeyrinə nüvə silahından imtina etməsəydi, bəlkə Kreml 2014-cü ildə Krımı ilhaq etməyə risk etməzdi. Dinamik inkişaf edən və bölgədə xeyli rəqibi olan Türkiyənin də nüvə silahına yiyələnməsinə ehtiyacı artır. Nüvə silahı Türkiyəyə təhlükəsizlik imkanlarını artırmaq üçün lazımdır. Bu silah Türkiyənin bölgədəki çəkisini artiracaq”.

Firuzə Vahid / REDAKTOR.AZ