Akar Taranla razılığa gəldi - Hərbi əməkdaşlıq dərinləşir

 00:00 11.04.2021     72

Ukrayna Müdafiə naziri Andrey Taran Türkiyənin Milli Müdafiə naziri Hulusi Akarla görüşündə "Bayraktar" PUA-larının tədarükünü, layihələrin inkişaf etdirilməsi məsələsini müzakirə edib.

Publika.az Türkiyə mətbuatına istinadla xəbər verir ki, bu barədə Ukrayna Müdafiə Nazirliyinin mətbuat xidmətinin məlumatında deyilir.

"Nazirlər hərbi-texniki əməkdaşlığın ikitərəfli inkişafı məsələsini ayrıca müzakirə etdilər. Söhbət zamanı ötən ilin dekabrında imzalanmış "korvet" sinifli gəmilərin tikintisi, "Bayraktar" pilotsuz uçuş aparatlarının və hərbi sursatların tədarükü barədə müqavilələrin gerçəkləşdirilməsi, eləcə də digər, xüsusilə aviasiya sahəsində layihələrin inkişafı perspektivləri nəzərdən keçirilib", - məlumatda bildirilir.

Qeyd olunur ki, Türkiyə və Ukraynanın müdafiə nazirləri müdafiə sahəsində ikitərəfli əməkdaşlığın inkişafında irəliləyiş olduğunu vurğulayaraq onların bundan sonra da dərinləşdirilməsi barədə razılığa gəliblər.

Görüşün sonunda Taran Türkiyə Milli Müdafiə nazirini Ukraynanın müstəqilliyinin 30 illiyi münasibətilə keçiriləcək mərasimə dəvət edib.

Qeyd edək ki, şənbə günü Ukrayna Prezidenti Vladimir Zelenski nümayəndə heyəti ilə birlikdə Türkiyəyə işgüzar səfər edib.


Bu xəbər Redaktor.az saytına məxsus deyil.
Xəbər mətninə görə ilk mənbə məsuliyyət daşıyır.
Xəbərin mənbəyi: https://publika.az/news/avropa/352412.html