DİM vətəndaşların onlayn növbə ilə qəbuluna başlayıb
Dövlət İmtahan Mərkəzinin Bakı şəhəri və digər bölgələrdə yerləşən regional bölmələrinin inzibati binalarında xüsusi karantin rejimi müddətində vətəndaşların onlayn növbə ilə qəbuluna başlanılır.
DİM-dən Redaktor.az-a verilən məlumata görə, vətəndaşların qəbulu 18 may 2020-ci il saat 09.30-dan etibarən DİM-in Bakı şəhərində yerləşən inzibati binalarında və rayonlarda yerləşən regional bölmələrində Mərkəzin internet saytı vasitəsilə əvvəlcədən onlayn növbə götürməklə həyata keçirilir.
Vətəndaşlardan yalnız zəruri hallarda onlayn növbə götürmək və xidmət mərkəzlərinə yaxınlaşmaq xahiş olunur. "Müraciətinizlə bağlı, ilk növbədə, 1653 Çağrı mərkəzinə zəng etməyinizi və ya sosial şəbəkə (“Facebook”, “Instagram”) hesablarımıza yazmağınızı tövsiyə edirik", - deyə DİM-dən bildirilb.
Onlayn növbə tutmaq üçün hər bir şəxs sistemdə tələb olunan məlumatları doldurmaqla (şəxsi məlumatlar, görüşün mövzusu, yeri, tarixi və saatı) xidmətdən rahat yararlana bilər. Bir şəxs gün ərzində yalnız 1 görüş təyin edə bilər. Təyin olunan görüşün vaxtını və yerini dəyişmək istəyənlər “Görüşdən imtina edirəm” bölməsinə müvafiq məlumatları daxil etməklə görüşdən imtina edib yeni görüş təyin edə bilərlər.
Vətəndaşların qəbulu şənbə, bazar və bayram günləri istisna olmaqla saat 9:30-dan 17-dək həyata keçirilir. Onlayn növbəyə yazılmış şəxslər binaya yaxınlaşdıqda şəxsiyyəti təsdiq edən sənədlərini təqdim etməlidirlər.
Tibbi maskasız müraciət edənlərin qəbulu həyata keçirilmir.
Bizi Telegram-da izləyin...
