“BakuBus” vədinə əməl etmir
Bu ilin aprelin 30-da “BakuBus” MMC istismarında olan 5 və 7A nömrəli marşrut xətləri üzrə hərəkət edən avtobuslarda pulsuz WiFi xidmətinin tətbiqini bəyan etdi.
Lakin o gündən 3 aydan çox keçsə də, 5 nömrəli marşrut xətləri üzrə hərəkət edən avtobuslarda pulsuz WiFi sərnişinlər üçün əlçatmaz olub.
Bu barədə Redaktor.az-a həmin marşrutdan müntəzəm istifadən edən sərnişinlər məlumat veriblər.
Onların sözlərinə görə, avtobuslarda WiFi xidmətinə qoşulma olsa da, internet yoxdur. Bu avtobusların bəzilərində ümumiyyətlə WiFi quraşdırılmayıb.
“BakuBus” MMC-dən şikayətlə bağlı sorğumuza cavab olaraq bildirildi ki, sözügedən marşrutda avtobuslar 30.04.2022-ci il tarixindən pulsuz WiFi xidmətinə qoşulub və həmin tarixdən sonrakı 3 ay sınaq müddəti kimi götürülüb.
“Hazırda bu sahədə qarşıya çıxan çətinliklərin aradan qaldırılması, o cümlədən şirkətə məxsus avtobuslardan istifadə edən sərnişinlərin daha sürətli internetlə təmin olunması istiqamətində iş aparılır. Yaxın vaxtlarda qarşıya çıxan çətinliklər aradan qaldırılaraq avtobusların daha sürətli internetlə təchiz olunması nəzərdə tutulur”,- deyə məlumatda qeyd edilib.
Bəzi avtobuslarda WiFi-ın quraşdırılmaması məsələsinə də toxunularaq qeyd olunub ki, “BakuBus” MMC-nin istismarında olan marşrut xətləri üzrə avtobusların mərhələli şəkildə pulsuz bu xidmətə qoşulması planlaşdırılır.
Qeyd edək ki, hazırda “BakuBus”a məxsus avtobuslarda WiFi-ya daxil olmaq üçün sərnişinlərin ad, soyad və telefon nömrəsi ilə qeydiyyatdan keçməsi tələb edilir. Bu kimi şəxsi məlumatlar nə dərəcədə əhəmiyyətlidir və necə qorunur? sualı MMC-dən belə cavablandırılıb:
““BakuBus” MMC-yə məxsus avtobuslarda sərnişinlərin pulsuz WiFi xidmətindən istifadə etməsi mövcud şərtlər çərçivəsində tənzimlənib və məlumatlar qanunvericiliyə uyğun olaraq qorunur. Həmçinin, bildiririk ki, artıq “BakuBus” MMC-yə məxsus avtobuslardan istifadə edən sərnişinlərdən pulsuz WiFi xidmətinə qoşulmaq üçün telefon nömrəsini yazmaq tələb olunmur. Onlar ad və soyadlarını daxil etməklə, pulsuz WiFi xidmətinə qoşula bilirlər”.
Nərmin Vüqarqızı
Bizi Telegram-da izləyin...
