AYNA sərnişinlərin şikayətinə aydınlıq gətirdi - AÇIQLAMA

 14:05 21.02.2025     158

Bu gün səhər saatlarında Buzovna-Maştağa yolunda bəzi sərnişinlər 107 nömrəli  avtobusun olmamasından, bəziləri isə gec gəlməsindən şikayətləniblər.

Mövzu ilə bağlı Redaktor.az "Azərbaycan Yerüstü Nəqliyyat Agentliyi"-nə sorğu göndərib.  Sorğuya cavab olaraq bildirildi ki, bəzi istiqamətlərdə yollar buzdan təmizləndikcə avtobusların xəttə buraxılması təmin edilib.

"Ölkə ərazisində müşahidə edilən qeyri-sabit hava şəraiti ilə əlaqədar sərnişindaşımanı həyata keçirən bütün daşıyıcılar gücləndirilmiş iş rejimində fəaliyyət göstərir. 
AYNA-nın Monitorinq Mərkəzi tərəfindən yollarda avtobusların hərəkəti nəzarətə götürülüb. Hazırda bütün marşrutlar üzrə sərnişin tələbatına uyğun olaraq daşımalar həyata keçirilir.  Xəttə gündəlik saya uyğun avtobuslar buraxılıb. Bəzi istiqamətlərdə yollar buzdan təmizləndikcə avtobusların xəttə buraxılması təmin edilib. Sürət həddi hava şəraiti nəzərə alınaraq tənzimləndiyi üçün avtobuslararası intervallarda artım müşahidə edilə bilər.
Hərəkət iştirakçılarına ehtiyatlı olmaları, kəskin hava şəraitinin davam etdiyi günlərdə ictimai nəqliyyatdan istifadəyə üstünlük vermələrini tövsiyə edirik". 

Qeyd edək ki, kəskin hava şəraiti ilə əlaqədar təhlükəsizliyin təmin edilməsi məqsədilə Bakı şəhəri və Abşeron rayonu ərazisində avtobuslar saat 21:30-dək fəaliyyət göstərəcək. Sərnişinlərdən səfərlərini planlayarkən bunu nəzərə almalarını xahiş edirik"-deyə şirkətin açıqlamasında qeyd olunur.

Aytəkin TOFİQQIZI

22