Balığın qiyməti bu səbəbdən qalxıb - AÇIQLAMA
Son günlərdə paytaxt bazarlarında balığın qiymətində artım müşahidə olunur.
Bəs bahalaşmaya səbəb nədir?
Mövzu ilə bağlı Redaktor.az-a danışan iqtisadçı ekspert Emin Qəribli bildirdi ki, balığın qiymət artımının səbəblərindən biri də hava şəraitidir:
"Hava şəraitinin dəyişməsi balıq qiymətlərinə birbaşa təsir göstərib. Bu isə öz sırasında təkliflərin azalmasına gətirib çıxarır. Nəticədə balıq qiymətlərinin artmasına şərait yaranıb. Hal-hazırkı vəziyyət isə müvəqqəti xarakter daşıyır".
İqtisadçının sözlərinə görə, yağışlı, küləkli və soyuq havalar balıqçılıq fəaliyyətini çətinləşdirir, bu da balıq istehsalının azalmasına səbəb olur.
"Nəticədə, təklifin azalması ilə qiymətlərdə artım müşahidə olunur. Hava şəraiti dəyişdikcə, balıqçıların balıq tutmaqda yaşadıqları çətinliklər, nəqliyyat və saxlanma məsələləri də qiymət artımına təsir edir. Bildiyimiz kimi, süni göllər kifayət qədər çoxdur, biz özümüzü təmin etmək iqtidarına qadirik. Ölkəmizdə idxal kifayət qədər mövcuddur. Hal-hazırda bu mövzuda narahatçılıq üçün səbəb yoxdur. Ola bilər ki, müəyyən “işbazlar” bu haldan istifadə edərlər. Amma bu, bazar sahəsidir. Bazar özü-özünü tənzimləyəcək. Çox güman ki, bu problem qısa zamanda həll olunacaq",- deyə ekspert bildirdi.
Aytəkin TOFİQQIZI
Bizi Telegram-da izləyin...
