Fəsil dəyişikliyi depressiya yaradır? - Psixoterapevt AÇIQLAMA
Artıq avqustun sonuncu həftəsini yola salaraq sentyabr ayını qarşılayırıq. Tez-tez müşahidə olunur ki, yay fəslinin sonunda havalar soyumağa, günlər qısalmağa başladıqca bir çox insanın əhvalında dəyişiklik yaranır. İstirahət və enerjili günlərin yerini yorğunluq, halsızlıq və hətta depressiya halları ala bilir.
Bəs niyə insanlar fəsil dəyişən zaman depressiyaya düşür?
Mövzu ilə bağlı Redaktor.az-a açıqlama verən həkim-psixoterapevt Məleykə İsmayılova bildirdi ki, əslində fəsil dəyişkənliyi depressiya yaratmır:
"Yay ayı istirahət ayıdır, depressiya yaradan isə istirahətin sonlanmasıdır. Əgər insan yaxşı istirahət edirsə, bədəni və ruhu komfort vəziyyətinə daxil olur və bu haldan çıxmaq istəmir. Ona görə də bu dəyişiklik bəzi insanlarda ruh düşkünlüyü, halsızlıq və əhval enməsi yaradır. Razılaşmalıyıq ki, insan övladı iki hiss ilə dünyaya gəlir: həzz və ağrı. Hər birimiz həzzə meyilli olduğumuz üçün belə rahatlıqdan ayrılmaq istəmirik, çünki bu vəziyyət həm beyin, həm də ruh üçün çətinlik kimi qəbul olunur. Lakin müəyyən zaman keçdikdən sonra anlayırıq ki, tədricən uyğunlaşırıq və qəbul edirik. Bu hal hər durumda müşahidə olunur, fəsillərin dəyişməsi zamanı da eyni ilə belədir".
Nuriyyə NATİQQIZI
Bizi Telegram-da izləyin...
