Təkrar mənzil bazarında UCUZLAŞMA: Təklif paketindən asılı olaraq...

 17:29 12.06.2019  168
Bakıda təkrar mənzil bazarında ucuzlaşma müşahidə olunur.
 
Ucuzlaşmanın səbəbləri ilə bağlı daşınmaz əmlak üzrə ekspert Rəşad Əliyev Redaktor.az-a açıqlama verib.
 
Ekspert bildirib ki, müşahidə olunan ucuzlaşma mövsümlə əlaqədardır:
 
“Hazırda təkrar mənzil bazarında kəskin ucuzlaşma müşahidə olunmur. Yəni, 1-2%-lik ucuzlaşma və ya bahalaşma ciddi dəyişikliyə təsir etmir. Bazara çıxarılan təklif paketindən asılı olaraq, qiymətlərdə dəyişiklik yaşanır. Ciddi dəyişiklik 5%-lik fərqə əsasən hesablanır. Ona görə də mövcud vəziyyətdə təkrar mənzil bazarında kəskin qiymət fərqliliyindən danışmaq mümkün deyil. 
 
 
Yay mövsümündə təkrar mənzil bazarında aktivlik müəyyən qədər aşağı düşür. 
 
Ümumilikdə yay aylarında təkrar mənzil bazarında passivlik müşahidə olunur. Mənzil bazarında alqı-satqı daha çox ucuz qiymətə olan mənzillərlə bağlı olur. Bu baxımdan Bakı ərazisində ucuz mənzillərin çox olduğu rayonlarda alqı-satqı əməliyyatları aktivlik təşkil edir. Mənzillər sahəsinə və yerləşdiyi əraziyə görə müxtəlif qiymətlərə satılır. Bütün hallarda keyfiyyətli mənzilin 1 kvadratmetri 1500 manatdan hesablanır. Mərkəzə doğru getdikcə isə bu qiymət iki dəfə artır. 
 
Vətəndaşların təkrar mənzilə marağı azalıb.
 
Bir neçə il öncəyə qədər vətəndaşlar təkrar mənzillərə böyük maraq göstərirdilər. Birinci səbəb odur ki, təkrar mənzillər adətən təmirli olur. İlkin mənzillər isə təmirsiz satılır. İkincisi, təkrar mənzillərin sahəsi yeni mənzillərə nisbətən bir qədər azdır. Üçünücüsü, qiymət baxımından təkrar mənzil bazarı cəlbedici idi. İlkin mənzillər təmirsiz satıldığına görə, təmir xərcləri müəyyən vəsaitə başa gəlir. Bu baxımdan təkrar mənzil almaq daha sərfəli idi. Dördüncüsü, təkrar mənzil alışı daha etibarlı hesab olunurdu. Lakin son zamanlar söküntü işlərinin başlaması təkrar mənzilə marağı azaldıb. Hazırda vətəndaşlar daha çox ilkin mənzillərə üstünlük verirlər”.
 
Qeyd edək ki, bu ilin aprel ayında təkrar mənzil bazarında qiymətlərin mart ayı ilə müqayisədə 1,1% azalıb.
 
Gülşən Şərif / Redaktor.az