Azərbaycanda plastik qablardan imtina mümkündürmü? - ÖMRÜMÜZÜ YEYƏNLƏR...

 15:30 02.09.2019     4636

Plastik su qabları hər zaman müzakirə mövzusu olub. Xüsusilə yay aylarında bu qabların zərərləri daha çox müzakirə mövzusu olur. Çünki mütəxəssislər sübut edir ki, plastik qablarda saxlanılan suların günəş altında qalması ciddi fəsadlara səbəb olur.

Həkim terapevt Ənvər Rustəmov Redaktor.az-a müsahibəsində bildirdi ki, təkrar istifadə etdikdə plastik qablarda, xüsusilə boğaz hissəsində çoxlu sayda mikroblar əmələ gəlir:

’’Təkrar emal zamanı plastik qablar mexaniki təsirə məruz qalır. Daxilində dioxid xərçəng yaradan kimyəvi birləşmə əmələ gəlir. Kimyəvi tərkibi dəyişmiş plastik məhsullar sağlam insan orqanizmində sinir sistemi, mədə-bagırsaq, ürək-damar xəstəlikləri yarada bilir. Müxtəlif xroniki xəstəliklərdən əziyyət çəkən insanların sağlamlıq vəziyyətinə də ciddi şəkildə təsir etmiş olur. Yaxşı olar ki, istehsalçı şirkətlər məhsulu təkrar emal edərkən tərkibinə orqanik və ya kimyəvi, lakin insan sağlamlığı üçün təhlükə yaratmayan birləşmələr əlavə etsinlər’’.

Bəs, plastik qablardan imtina hazırda Azərbaycan üçün nə qədər realdır?

Azad İstehlakçılar Birliyinin (AİB) sədri Eyyub Hüseynov Redaktor.az-a açıqlamasında bildirib ki, plastik qablardan imtina hazırda real görünmür: 

‘’Ərzaq məhsullarının 85 faizi plastik qablarda qablaşdırılır. Buna administrativ yollarla hökumət qadağa qoya bilməz. Çünki bazarda qıtlıq yarana bilər. Xaricdən məhsul gəlməz, nəticədə ölkədə ərzaqla bağlı çətinliklər yarana bilər".

Ekspert Azərbaycanda plastik məhsullardan istifadə zamanı əhalinin sağlamlığı üçün ciddi problem riskinin qeydə alınmadığını bildirdi:

’’Səhiyyə Nazirliyi tədqiqat aparmalıdır. Təəssüf ki, bu barədə heç bir tədqiqat yoxdur. Əlbəttə, istehlahçı günün qabağında satılan bir məhsulu alırsa, özü bilməlidir ki, belə halda satılan su təhlükəlidir. Hətta ana suyu içib, qabına uşaq qidası töküb, üstünə də rezin əmzik keçirib, uşağına qida verirsə, bilməlidir ki, bu, onun övladına ziyandır. Əgər, istehsalçı bazardan üzüm yarpağı alırsa və həmin yarpaqlar plastik qablara yığılırsa, üstəlik üzərinə sirkə tökülürsə, deməli istehlakçı özünü və ailəsini zəhərlənmə təhlükəsi ilə üz-üzə qoyur. Bu məsələ istehlakçılar tərəfindən öz həllini tapmalıdır"

Eyyub Hüseynov bildirdi ki, Azərbaycanda plastik materialların utilizasiyası üçün xüsusi bir işçi komissiya fəaliyyət göstərir:

'' Bu komissiya plastik tullantıların yığılması və utilizasiyası ilə məşğul olur. AİB də həmin komissiyanın üzvüdür. Bu, İqtisadiyyat Nazirliyi və "Təmiz Şəhər" ASC-nin birgə komissiyasıdır. Düşünürəm ki, Plastik materialları utilizasiya edib onu digər sənaye təyinatlı məhsullara çevirən biznes qurumlarının sayı artmalıdır. Azad İstehlakçılar Birliyi plastik materialların utilizasiyasına aid İməcliyi  Beyləqan rayonunda başlayıb. Bir neçə zibilxananı təmizləyib, plastik materialları yandıraraq  basdırmışıq. Bu işdə xüsusən Beyləqan Rayon İcra hakimiyyəti və bələdiyyələrin də rolu böyük olub''

Eyub Hüseynov plastik torbalardan istifadə etməyən istehsalçılara da mesaj verdi:

 '' Azad İstehlakçılar Birliyi olaraq, xüsusən də plastik torbalardan istifadə etməyən istehlakçıların hüquqlarını təmənnasız olaraq qorumağa hazırıq. Onlar bizə həmin torbaları göstərsinlər, biz onlara möhür vurub, hətta məhkəmə instansiyalarına qədər gedə bilərik. Yetər ki, insanların hüquqları tapdanmasın''.

Redaktor.az