"Qarabağ" nə vururdusa, hamısı qol olurdu" - Rəşad Sadıqov

"Danışılacaq çox şey yoxdur. Rəqib açıq-aşkar bizdən üstün idi. İlk hissədə oyun düşündüyümüz kimi gedirdi. Fasilədən sonra istədiyimiz alınmadı. Nəticədə böyük hesabla məğlub olduq".

Redaktor.az xəbər verir ki, bunu "Zirə"nin baş məşqçisi Rəşad Sadıqov evdə "Qarabağ"a 1:7 hesabı ilə uduzduqları Azərbaycan Premyer Liqasının VII tur oyunundan sonra mətbuat konfransında deyib.

40 yaşlı mütəxəssis rəqibin böyük motivasiya və istəklə oynadığını bildirib: "Belə məğlubiyyətin bir çox səbəbləri var. Birinci qolu buraxmağımız an rəqibdə inam artdı. Kobud səhvlərimiz oldu. "Qarabağ" 8 qol epizodu yaratdı və bunların 7-si dəqiq alındı. Rəqib nə vururdusa, hamısı qol olurdu. Ramil Şeydayevin epizodundan başqa boşa verilən qol anı xatırlamıram".

Sadıqov rəqibin bu gün qarşısıalınmaz olduğunu söyləyib: "Hesabın böyük olmaması üçün müəyyən dəyişikliklər etdik. Amma alınmadı. Müdafiədə boşluqlar var idi. Bu gün Musa Qurbanlının günü idi. Onda hər şey alınırdı. Bizim üçün uğursuz gün idi. Rəqib üçün isə uğurlu gün oldu.

Baş məşqçi ilk yarıda qapalı futbol oynamaq istədiklərini diqqətə çatdırıb: "Birinci hissədə qol vurduq, amma sistem işləmirdi. Hücum xəttini gücləndirmək niyyətində olsaq da, əks effekt verdi. Qismət Alıyev zədəli olduğu üçün ikinci yarıda meydana buraxdıq. Keyta Hamidu da eyni durumdur. Onu da eyni səbəbdən ikinci hissədə əvəzlədik. Bir çox futbolçu bu gün ən zəif oyunlarını keçirdilər. Rəqib də çox sürətli və dinamik çıxış edirdi. Mənim oyun fəlsəfəmdə meydanın mərkəzindən cərimə meydançasında asma yoxdur".

Mütəxəssis bu məğlubiyyətin komandada inamsızlıq yaratmayacağını sözlərinə əlavə edib: "Hər baş məşqçinin karyerasında belə məğlubiyyətlər olur. Mən də özümü hazırlayırdım. Bu gün belə alındı. Qarşıda iki həlledici oyunumuz var. Bu gün üçün xala, qələbəyə ümidli idik. Amma reallıq odur ki, “Qarabağ” bizdən 2-3 baş üstündür. Vacib olan növbəti matçlarımızdır".

Sadıqov son olaraq "köhlən atlar"ın UEFA Avropa Liqasının qrup mərhələsindəki çıxışını dəyərləndirib: "Komanda möhtəşəm çıxış edir. Hazırda növbəti matç barədə düşünməlidirlər və qrupdan çıxmaq barədə danışmamalıdırlar" (report).