Azərbaycanın olimpiya çempionu: "Nağı Səfərov hamını aldadır"
"Onun dedikləri doğru deyil, hamını aldadır".
Redaktor.az xəbər verir ki, bunu açıqlamasında Azərbaycan millisinin sabiq taekvondoçusu Radik İsayev federasiyanın vitse-prezidenti Nağı Səfərovun onun və Milad Beiqi Harçeqaninin haqqında səsləndirdiyi fikirlərə münasibət bildirərkən deyib.
Səfərov daha əvvəl bildirib ki, sözügedən taekvondoçuların qarşısına ölkə çempionatında iştirakla bağlı şərt qoyulsa də, onlar yarışa qatılmayıblar. Həmçinin, federasiya rəsmisi İsayevlə Harçeqaninin millidəki karyeralarını bitirməklə bağlı qərarın məhz idmançılara məxsus olduğunu söyləyib.
80 kq-dan yuxarı çəki dərəcəsində Avropa, dünya və olimpiya çempionu olmuş İsayev isə vitse-prezidenti doğrunu danışmamaqda ittiham edib: "Orada anlaşmazlıq oldu. Əvvəlcə Rza Mehmandostu istefaya göndərdilər, sonra isə geri qaytardılar. Bundan sonra baş məşqçi bizi - yığmanın bir nömrələrini Sloveniyadakı təlim-məşq toplanışına aparmadı. Beynəlxalq turnirlərə də bizsiz getdilər. Azərbaycan çempionatı isə bu hadisədən təqribən 1,5 il sonra keçirildi. Bu isə o deməkdir ki, Nağı Səfərov yalan danışır. Bizə elə gəlirdi ki, qalıb federasiyada işləyəcəyik. Amma, görünür, onların başqa planları var imiş. İdmançı kimi böyük təcrübəmiz var, gənclərə kömək edə bilərdik. Lakin federasiya rəhbərliyi fərqli qərar qəbul etdi".
Titullu idmançı Azərbaycan taekvondoçularının Bakıda keçirilən dünya çempionatında medal qazana bilməmələrinə də toxunub: "Bütün sualları baş məşqçiyə vermək lazımdır. Ondan soruşulmalıdır ki, niyə belə oldu. Medal yoxdur, amma heç nəyi dəyişmək istəmirlər. Belə olmur, axı! Yaxud da Niyaməddin Paşayev və ya Nağı Səfərovdan soruşun. Mən artıq bu sistemin içində deyiləm. Millidə yer alan uşaqların hamısı gəncdir, aralarında təcrübəli idmançılar çox azdır" (report).
Bizi Telegram-da izləyin...
