“Qalatasaray” derbidən qalib ayrıldı
Türkiyə Superliqasının 11-ci turunda Beyoğlu derbisi baş tutub. “Qalatasaray” öz meydanında “Kasımpaşa”nı minimal hesabla məğlub edib.
Redaktor.az xəbər verir ki, Ali Sami Yen Stadionunda keçirilən matç afrikalı Vilfrid Zahanın dublu ilə yadda qalıb.
Belə ki, 33-cü dəqiqədə “Qalatasaray” Zahanın sayəsində bərabərliyi pozub. Birinci hissədə başqa qol olmayıb. 51-ci dəqiqədə “sarı-qırmızılar” hesabdakı fərqi artırıblar: Zaha növbəti qola imza atıb. Cəmi 3 dəqiqə sonra “Kasımpaşa” “Qalatasaray”ın üstünlüyünü azaltsa da, matçda başqa qol olmayıb. Beləliklə, Beyoğlu derbisi “Cimbom”un 2:1 hesablı qələbəsi ilə başa çatıb.
Qeyd edək ki, 11 oyundan sonra “Qalatasaray” ən azı müvəqqəti də olsa, turnir cədvəlinin zirvəsinə yüksəlib. “Sarı-qırmızılar”ın aktivində 31 xal var. Onların ən yaxın təqibçisi 1 xal fərqlə “Fənərbağça”dır, lakin “Cimbom”un əzəli rəqibinin ehtiyatında bir oyun var. “Kasımpaşa” isə 11 oyundan sonra 18 xalla 5-ci pillədə qalıb.
Bizi Telegram-da izləyin...
