Çempionlar Liqasında gecənin NƏTİCƏLƏRİ
UEFA Çempionlar Liqasında ilk iki 1/4 finalçı müəyyənləşib.
Redaktor.az xəbər verir ki, 1/8 final mərhələsi çərçivəsində keçirilən iki cavab görüşündən sonra buna aydınlıq gəlib.
İtaliyada “Latsio”ya 0:1 hesabı ilə uduzan “Bavariya” bunun əvəzini Almaniyada çıxıb. Münhen təmsilçisi Harri Keyn (38 və 66-cı dəqiqə) və Tomas Müllerin (45+2) qolları sayəsində 3:0 hesablı qələbə qazanıb.
Digər cütlükdə PSJ Fransada olduğu (2:0) kimi, İspaniyada da “Real Sosyedad”ı məğlub edib - 2:1. Parislilərin heyətində 15 və 56-cı dəqiqələrdə Kilian Mbappe fərqlənib. Meydan sahiblərində isə Mikel Merino 89-cu dəqiqədə təsəlli qolunun müəllifi olub.
Beləliklə, “Bavariya” və PSJ Çempionlar Liqasında 1/4 finala adlayıblar.
Bizi Telegram-da izləyin...
