Aslan Kərimov "Neftçi"nin uğursuzluqlarının səbəbini GÖSTƏRDİ
""Neftçi"in əsas uğursuzluqlarının səbəbi məşqçilərin tez-tez dəyişilməsidir. Bu da, təbii ki, başa düşüləndir. Onlar da məşqçi təyin edərkən tez bir zamanda nəticə əldə etmək istəyirlər. Amma hər bir məşqçi dəyişikliyi özü özlüyündə performansın aşağı düşməsinə səbəb olur. Çünki istənilən yeni bir məşqçi özünün düşüncəsində olan oyunçu tiplərini yığmalı, ümumi oyun üslubu ortaya qoymalıdır və bu da asan məsələ deyil".
Bu sözləri futbol eksperti, Azərbaycan millisinin keçmiş üzvü Aslan Kərimov Redaktor.az-a açıqlamasında bildirdi.
Onun sözlərinə görə, hazırda "Neftçi" məşqçi baxımından doğru seçim edib:
"Çünki Samir Abbasovun rəhbərliyi altında "ağ-qaralar" "Qarabağ"a da qalib gəlmişdi, çempionatda birinci yer tutmuşdu. Məşqçi öz düşüncəsində olan oyun üslubunu ortaya qoymaqdan ötrü də istədiyi tipdə komandanı formalaşdırmalıdır, oyunçular transfer etməlidir. Hazırkı durumda "Neftçi"nin oyununda artım təbii ki, gözlənilir. Ən azından "Kəpəz"lə oyundakı ruhsuzluğu görmürük, oyunçular son damla tərinə qədər mübarizə aparırlar. Amma oyunda nəticəni əldə edə bilmirlər, çünki bəzi mövqelərdə olan oyunçular var ki, onların həddindən artıq kobud səhvləri olur".
Keçmiş futbolçu bildirdi ki, "Neftçi"nin zamana ehtiyacı var:
"Yəqin ki, bunun düzəlməsi üçün qış fasiləsində texniki heyətin üzərinə həddindən çox iş düşəcək. Oyunçu almaq məcburiyyətindədirlər və o oyun üslubunu ortaya qoymalıdırlar. Bunun üçün bəzən bir il belə bəs etmir. Çünki oyunçuların özlərinin düşüncəsində də bu səviyyəyə gəlib çıxdıqları bir oyun tərzi var. Həmin tərzdən çıxıb məşqçinin tərzinə uymaq asan olmur. Düşünürəm ki, bu il onlar üçün formalaşma ili olmalıdır ki, növbəti ildən artıq çempionluq uğrunda mübarizə aparsınlar. Hesab edirəm ki, ən azından onların oyunçu transferi üçün imkanları var. Ancaq bir məsələ də var ki, indiki durumda o qədər də asan deyil. Çünki bəlli oyunçular transfer olunub və büdcədən pullar ayrılıb. Həmin oyunçuları birdən-birə dəyişmək olmaz. Bu, komandaya büdcə olaraq zərbə vurmaq deməkdir. Ona görə ən azından var olan oyunçulardan maksimum dərəcədə istifadə etmək lazımdır".
Sevinc İBRAHİMZADƏ
Bizi Telegram-da izləyin...
