"Azərbaycan futbolu nəinki yerindən tərpənməyəcək, ümumiyyətlə batıb gedəcək" - Rövşən Binnətli
"Azərbaycan futbolunda çatışan heç nə yoxdur. İdarəetmədən tutmuş özünü təsdiqləmiş infrastrukturun mövcudluğuna qədər hər şey bərbad vəziyyətdədir. Bu gün "Cəngi" komandası yaranırsa, bunun özü də bir ilğımdır, epizodikdir".
Bu sözləri idman eksperti Rövşən Binnətli Redaktor.az-a Bakını təmsil edəcək yeni futbol klubu - "Cəngi"nin fəaliyyətə başlaması ilə bağlı danışarkən dedi.
"Birinci növbədə klub yaranırsa, maddi bazası, infrastrukturu olmalıdır. Heç nəyi yoxdursa, sabah deyəcək ki, bizə top verin, futbolçularımıza pul verin, geyinməyə kömək verin. Bizim klublar bu cür yaranır və kiminsə marağına xidmət edir. Müəyyən bir müddət aşağı dəstədə oynayırlar, sonra yox olurlar. Komandaların AFFA-ya üzv kimi qəbul olunması üçün şərtlər olmalıdır. Şərtlərə cavab vermirsə, ora cəlb oluna bilməz. Əgər peşəkar klubdursa, birinci bazası olmalıdır, stadionu olmalıdır və təkcə oyunun keçirildiyi stadion yox, məşq stadionları da, müəyyən maddi kapitalı da olmalıdır. Bütün bu şərtlərə cavab verirsə, Region Liqasına qəbul oluna bilər. Yəni aşağıdan başlamalı, inkişaf edə-edə yuxarı qalxmalıdır".
R.Binnətli Azərbaycan futbolunun problemlərindən də bəhs etdi:
"Klubun yaranması üçün AFFA-nın hansı şərtləri var? Hansı şərtlərə cavab verilməlidir ki, o klub fəaliyyətə başlasın? Bu olmadığı halda elə bil ki, olmayan bir evin damını tikirsən. Bizim futbolumuz hazırda belə vəziyyətdədir. Həçənd "Cəngi" klubuna cəngi kimi kəsərli olmağı arzulayıram. Amma indiki vəziyyətdə 10 dənə də "Cəngi" yaransa, Azərbaycan futbolu nəinki yerindən tərpənməyəcək, ümumiyyətlə batıb gedəcək. Mənim insanları nə ruhdan salmaq fikrim var, nə də ki, onların işinə kölgə salmağı düşünürəm.
Mövcud klublarımız dağılmağa doğru gedir, nəinki yeri yaranan bir klubdan biz nə isə gözləyək. Hələ görək bu mövcud klublar yaşaya biləcək? Bu klubların yaranması bir nəfərin cibindən asılıdır. O bir nəfər kisənin ağzını bağlayan kimi klub məhv olub gedir. Çünki klubun yaranması üçün hər hansı bir şərtlər irəli sürülməyib və o şərtlərə əsasən klubların yaranması və AFFA-ya qəbulu istiqamətində demək olar ki, heç bir iş yoxdur".
İdman ekspeti "Qarabağ"dan danışarkən bildirdi ki, Azərbaycan futbolu bu klubun sayəsinə ayaqüstə durur:
"Ən yaxın qonşularımız Rusiyanı, Gürcüstanı götürək, orada klublar necə yaranır. Biz də elə ola bilərdik. Azərbaycan futbolu "Qarabağ" komandasının azdan-çoxdan nailiyyətlərinin arxasında gizlənir. Əgər o komanda olmasaydı, Azərbaycan futbolu mən bilmirəm hansı formada ictimaiyyətə üzü olardı. Bir onlara görə ölkəmizə güclü komandalar gəlir".
Sevinc İBRAHİMZADƏ
Bizi Telegram-da izləyin...
