İdman ekspertindən Messinin Bakı səfərinə REAKSİYA: "Futbol tədbiri çərçivəsində gəlsəydi..."
Lionel Messi və dünya ulduzları Luis Suarez, Serxio Buskets və Xordi Albanın Azərbaycana səfəri böyük maraq doğurub. Onlar Bakıdakı xüsusi bir tədbirdə iştirak etmək üçün ölkəyə dəvət olunub.
Bəs bu səfər ölkəmiz üçün, xüsusilə ölkə futbolu üçün nələr vəd edir?
İdman eksperti Araz Əhmədov Redaktor.az-a bildirdi ki, Azərbaycana Lionel Messidən öncə də ulduz futbolçular gəlib:
"Elə bir müddət öncə COP29 çərçivəsində braziliyalı sabiq ulduz Ronaldinyonun gəlişi də buna bariz nümunədir. Təbii ki, belə futbolçuların gəlişi zamanı futbolsevərlər özlərinin kumirləri olan bu futbolçuları görmək üçün zallara, stadionlara axışır. Messinin gəlişi də bu qəbildəndir".
Nüsahibimizin fikrincə, yaxşı olardı ki, Messi hər hansı bir futbol tədbiri çərçivəsində Azərbaycana gələrdi, o zaman daha effektiv olardı:
"Çünki indiki gəlişi daha çox şou və əyləncə xarakterli bir gəliş idi və bundan Azərbaycan futbolunun nələrsə götürəcəyini, hansısa effektiv bir iş olacağını düşünmürəm. Futbol tədbiri çərçivəsində olsaydı və yaxud hansısa klubumuzun dəvəti ilə Bakıya gəlsəydi, məncə, Azərbaycan futbolu üçün səmərəli nəsə etmək olardı".
Qeyd edək ki, bu səfərin təşəbbüskarı azərbaycanlı iş adamı Adnan Əhmədzadədir. O, daha əvvəl Ronaldinyonun səfərini də təşkil etmişdi.
Sevinc İBRAHİMZADƏ
Bizi Telegram-da izləyin...
