İngiltərə Premyer Liqası: “Çelsi” London derbisindən qalib AYRILDI
İngiltərə Premyer Liqasının XXX turunda Londonun “Çelsi” klubu eyni şəhəri təmsil edən “Tottenhem”i qəbul edib.
Redaktor.az xəbər verir ki, “Stemford Bric”də keçiril'n matçı baş hakim Kreyq Pouson idarə edib.
Oyunun ilk hissəsi, “zadəganlar”ın üstünlüyünə baxmayaraq, qolsuz yekunlaşıb. İkinci yarıda tempi artıran ev sahibləri 50-ci dəqiqədə istəklərinə çatıblar. Kol Palmerin hava ötürməsindən sonra Entso Fernandes topu başla qapıya göndərib.
Bundan 10 dəqiqə sonra “Çelsi”nin ekvadorlu yarımmüdafiəçisi Moyses Kaysedo toru silkələsə də, VAR-a baxıldıqdan sonra öncəki epizodda qeydə alınmış ofsayda görə qol ləğv edilib. 69-cu dəqiqədə “mahmızlar”ın seneqallı yarımmüdafiəçisi Pap Matar Sarr uzaqdan zərbə ilə hesabı bərabərləşdirib. Lakin VAR-a baxıldıqdan sonra baş hakim qolu ləğv edib.
Beləliklə, “Çelsi” 30 oyundan sonra 52 xalla “Nyukasl” (29 oyuna 50 xal) və “Mançester Siti”ni (30 oyuna 51 xal) geridə qoyaraq turnir cədvəlinin dördüncü pilləsinə yüksəlib. “Tottenhem” 34 xalla 14-cü yerdə qalıb. Turnir cədvəlinə 73 xala malik “Liverpul” başçılıq edir.
Entso Mareskanın yetirmələri növbəti turda səfərdə “Brentford”la üzləşəcəklər, Angelos Postekoqlunun komandası isə evdə autsayder “Sauthempton”u sınayacaq.
Qeyd edək ki, “Çelsi” – “Tottenhem” derbisi XX əsrin ortalarından bəri Londonun ən prinsipial qarşılaşmalarından biridir. Klublar arasında rəqabət 1967-ci ildə iki London komandası arasında tarixdə ilk İngiltərə Kuboku finalından sonra kəskinləşib. Həmin oyunu “Tottenhem” qazanmışdı. 2016-cı ildə “Çelsi” “Tottenhem”lə heç-heçə (2:2) etdiyi, “mahmızlar”ın çempionluq ümidinə son qoyduğu və titulu “Lester”ə verdiyi zaman gərginlik xüsusilə yüksəlmişdi.
Bizi Telegram-da izləyin...
