Əli Əsgərov V dan qara kəmər dərəcəsinə layiq GÖRÜLDÜ
İyulun 5-də “Sərhədçi” İdman Mərkəzində Azərbaycan Karate Federasiyası (AKF) və Arpaçay İdman Birliyinin təşkilatçılığı ilə keçirilən “Zəfər Kuboku” turnirin təntənəli açılış mərasimi keçirilib.
Redaktor.az xəbər verir ki, əvvəlcə Ümummilli Lider Heydər Əliyevin və Azərbaycanın ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Daha sonra dövlət himni səsləndirilib.
Açılış nitqi ilə çıxış edən AKF-in prezidenti, millət vəkili Ülvi Quliyev 44 günlük Vətən müharibəsində əldə edilən möhtəşəm zəfərin müstəqil Azərbaycanın tarixində oynadığı roldan danışıb.
Daha sonra çıxış edən Milli Müdafiə Universitetinin tabeliyində fəaliyyət göstərən Cəmşid Naxçıvanski adına Hərbi Liseyin rəisi, Vətən Müharibəsi Qəhrəmanı Anar Mirzəyev Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi altında torpaqlarımızın azad olunmasından bəhs edib, 5-ci illiyini qeyd edəcəyimiz Zəfərin tarixi səlnaməsinin gənclərin vətənpərvərlik tərbiyəsindəki önəmini vurğulayıb.
Çıxış edən Milli Məclisin deputatları Fazil Mustafa və Vüqar Rəhimzadə Azərbaycanda idmana göstərilən qayğıdan və əldə edilən möhtəşəm qələbənin qazanılmasında idmançı gənclərin rolundan danışıblar.
Tədbirdə çıxış edən Arpaçay İdman Birliyinin vitse-prezidenti Yavər Hüseynov təşkilatın prezidenti Əli Əsgərovun son illərdə sağlam gənc nəslin yetişməsində xidmətlərinə, o cümlədən karate idman növünün inkişafına göstərdiyi diqqət və dəstəyə görə minnətdarlığını çatdırıb.
Daha sonra AKF-in prezidenti tərəfindən karate idman növünün inkişafında göstərdiyi xidmətlərə görə Əli Əsgərova V dan qara kəmər dərəcəsinin fəxri diplomu təqdim edilib.
Bizi Telegram-da izləyin...
