"Fənərbaxça" 18 ildən sonra Çempionlar Liqasının liqa mərhələsində!
UEFA Çempionlar Liqasının pley-off mərhələsinin cavab oyununda Türkiyə təmsilçisi "Fənərbaxça" səfərdə Fransanın “Lion” klubunu 2:1 hesabı ilə məğlub edib.
Redaktor.az xəbər verir ki, İstanbulda keçirilən ilk qarşılaşmada 1:1 hesablı heç-heçə qeydə alındığından, iki oyunun ümumi nəticəsində "Fənərbaxça" 3:2 hesabı ilə qalib gəlib və Çempionlar Liqasının əsas mərhələsinə vəsiqə qazanıb. UEFA-nın məlumatına görə, İstanbul klubunun Çempionlar Liqasının qrup/liqa mərhələsində son iştirakı 2008/09 mövsümündə olub.
"Fənərbaxça" ilk hissədə işi həll etdi
"Fənərbaxça" Fransadakı qarşılaşmaya fəal başlayıb və 24-cü dəqiqədə hesabı açıb. Vedat Muriqi komandasını önə keçirib.
Cəmi 4 dəqiqə sonra, 28-ci dəqiqədə Arçi Braun fərqi iki topa çatdırıb. Beləliklə, İstanbul klubunun ilk hissədəki üstünlüyü 2:0 olub. Braunun qolunda assisti Meyson Qrinvud edib. Muriqinin qolunun assist müəllifi isə Oğuz Aydın olub.
İkinci hissədə “Lion” fərqi azaltmağa çalışıb. Fransızların səyləri 61-ci dəqiqədə nəticə verib. Malik Fofana hesabı 1:2-yə çatdırıb. Bu qolda assisti Eynsli Meytland-Naylz verib.
Qalan dəqiqələrdə “Lion” daha bir qol vurmaq üçün təzyiq göstərsə də, "Fənərbaxça" müdafiədə hesabı qoruyub və qarşılaşmanı 2:1 hesablı qələbə ilə başa vurub.
Matçın statistikası
Qarşılaşmada topa daha çox “Lion” sahib olub – 59 faiz. "Fənərbaxça"nın topa sahibolma göstəricisi isə 41 faiz təşkil edib.
Gözlənilən qollar (xG) göstəricisində də Fransa klubu öndə olub: “Lion” – 1,59, "Fənərbaxça" – 1,23.
Qapıya dəqiq zərbələrdə də meydan sahibləri üstün olub – 7:6. Qazanılan duellərdə isə "Fənərbaxça" 48 faiz, “Lion” 52 faiz göstəriciyə sahib olub.
Buna baxmayaraq, "Fənərbaxça" yaratdığı imkanlardan daha səmərəli istifadə edərək vacib qələbəyə imza atıb.
18 illik fasilə başa çatdı
Bu nəticə ilə "Fənərbaxça" 18 illik fasilədən sonra yenidən Avropanın ən nüfuzlu klub turnirinin əsas mərhələsində mübarizə aparacaq.
İstanbul təmsilçisi sonuncu dəfə 2008/09 mövsümündə Çempionlar Liqasının qrup mərhələsində çıxış edib. Həmin mövsümdən sonra klub bir neçə dəfə təsnifat və pley-off mərhələlərində mübarizə aparsa da, əsas mərhələyə yüksələ bilməyib.
Yeni formatda artıq “qrup mərhələsi” deyil, “liqa mərhələsi” adlandırılan əsas mərhələdə "Fənərbaxça"nı Avropanın ən güclü klubları ilə oyunlar gözləyir.
Turan ASLAN
Bizi Telegram-da izləyin...
