Mançester derbisində sensasiya: “Siti” 10 nəfərlə “Yunayted”i məğlub etdi
İngiltərə Premyer Liqasının 4-cü turunda Mançester derbisi keçirilib. “Mançester Yunayted” doğma meydanda “Mançester Siti”ni qəbul edib.
Redaktor.az xəvbər verir ki, “Old Trafford” stadionunda keçirilən gərgin qarşılaşma qonaqların 1:0 hesablı qələbəsi ilə başa çatıb. “Mançester Siti” matçın 23-cü dəqiqəsindən etibarən 10 nəfərlə oynasa da, derbidən 3 xalla ayrılmağı bacarıb.
Oyunun 23-cü dəqiqəsində “Mançester Siti”nin futbolçusu Fil Foden birbaşa qırmızı vərəqə alıb. Bruno Fernandeslə yaşanan insidentdən sonra meydandan kənarlaşdırılan Foden komandasını azlıqda qoyub. Qırmızı vərəqə VAR yoxlamasından sonra da qüvvədə saxlanılıb.
Say üstünlüyü qazanan “Mançester Yunayted” bundan maksimum yararlana bilməyib. Əksinə, azlıqda qalan “Siti” ikinci hissədə hesabı açıb.
60-cı dəqiqədə Erlinq Haaland fərqlənərək qonaqları 1:0 hesabı ilə önə keçirib. Qol VAR tərəfindən də yoxlanılıb və təsdiqlənib.
Bundan sonra “Mançester Yunayted” hesabı bərabərləşdirmək üçün təzyiqi artırsa da, “Siti”nin müdafiəsi sona qədər tab gətirib. Ev sahiblərinin bir neçə təhlükəli epizodu olsa da, heç biri qolla nəticələnməyib.
Görüşdə gərginlik son dəqiqələrdə də davam edib. “Mançester Siti”nin futbolçusu Yoşko Qvardiol 79-cu dəqiqədə, “Mançester Yunayted”in oyunçuları Enzo Fernandes 80-ci, Harri Maquayr isə 81-ci dəqiqədə sarı vərəqə ilə cəzalandırılıb.
Beləliklə, “Mançester Siti” Premyer Liqada mövsümə 4 qələbə ilə başlayıb və 12 xal toplayıb. Komanda turnir cədvəlində 2-ci pillədə qərarlaşıb.
“Mançester Yunayted” isə 4 turdan sonra 4 xalla 13-cü yerdədir.
Turan ASLAN
Bizi Telegram-da izləyin...
