“Barselona” Romada şou göstərdi - ÇL-də darmadağın
UEFA Qadınlar Çempionlar Liqasının liqa mərhələsinin 2-ci turunda “Roma” və “Barselona” qadın komandaları üz-üzə gəlib.
Redaktor.az xəbər verir ki, Romadakı qarşılaşmada Kataloniya təmsilçisi meydan sahiblərinə heç bir şans verməyib. “Barselona” “Roma”nı 6:0 hesabı ilə məğlub edib.
Qonaqlar artıq ilk hissədə üstünlüyü ələ keçiriblər. 19-cu dəqiqədə Kerolin Qrehem Hansen hesabı açıb. 39-cu dəqiqədə isə “Roma”nın futbolçusu Şükurat Oladipo topu öz qapısına göndərib. Beləliklə, “Barselona” fasiləyə 2:0 hesablı üstünlüklə yollanıb.
İkinci hissədə də kataloniyalıların hücumları davam edib. 53-cü dəqiqədə Klaudiya Pina fərqi üç topa çatdırıb. 60-cı dəqiqədə isə Kerolin Qrehem Hansen yenidən fərqlənərək özünün ikinci qolunu vurub – 4:0.
“Barselona” bununla kifayətlənməyib. 75-ci dəqiqədə Klaudiya Pina da dublunu rəsmiləşdirib. Görüşün 85-ci dəqiqəsində isə Eva Payor komandasının altıncı qolunu vuraraq yekun hesabı müəyyənləşdirib.
Beləliklə, Kerolin Qrehem Hansen və Klaudiya Pina matçda iki dəfə fərqləniblər. Eva Payor isə bir qolla yadda qalıb.
Qarşılaşmada “Barselona”nın üstünlüyü matçın statistikasında da özünü göstərib. Kataloniya klubu bütün görüş ərzində hücumda daha fəal olub və “Roma”nın qapısında ciddi təhlükələr yaradıb.
“Barselona” üçün bu qələbə “Roma” ilə oyunlardakı uğurlu seriyanın davamı olub. Kataloniya təmsilçisi daha əvvəl də İtaliya klubuna qarşı keçirdiyi görüşlərdə qalib gəlib.
Bu nəticə ilə “Barselona” Çempionlar Liqasının liqa mərhələsində növbəti qələbəsini əldə edib. Komanda ilk turda “Paris FC”ni də məğlub etmişdi.
“Roma” isə turnirdə ilk qələbəsini qazana bilməyib. İtaliya təmsilçisi ilk turda “OH Leuven”lə qolsuz heç-heçə etmişdi.
Turan ASLAN
Bizi Telegram-da izləyin...
