Millətlər Liqasında növbəti oyunlar: Polşadan darmadağın, Fransa və İtaliya heç-heçə etdi

UEFA Millətlər Liqasının 2026/27 mövsümündə növbəti oyunlar keçirilib.

Redaktor.az xəbər verir ki, A, B və C Liqalarında baş tutan qarşılaşmalarda diqqətçəkən nəticələr qeydə alınıb. Gecənin ən böyükhesablı qələbəsini Polşa millisi əldə edib. Fransa və İtaliya isə prinsipial görüşdə heç-heçə edib. Şimali İrlandiya Ukraynanı səfərdə 3:0 hesabı ilə məğlub edib.

Polşa 6:0 Rumıniya

Günün ən böyükhesablı qələbəsi Polşanın payına düşüb. Öz meydanında Rumıniyanı qəbul edən Polşa millisi rəqib qapısından 6 cavabsız top keçirib.

Qarşılaşmanın əsas qəhrəmanı Robert Levandovski olub. Təcrübəli hücumçu 24-cü dəqiqədə hesabı açıb. İkinci hissənin əvvəlində – 47-ci dəqiqədə Levandovski fərqi iki topa çatdırıb.

Bundan cəmi iki dəqiqə sonra Rumıniyanın müdafiəçisi Vircil Kitsanın avtoqolu Polşanın üstünlüyünü daha da artırıb. 62-ci dəqiqədə Pyotr Zelinski, 66-cı dəqiqədə isə Yan Bednarek fərqlənərək hesabı 5:0-a çatdırıblar.

Levandovski 86-cı dəqiqədə het-trikini rəsmiləşdirərək qarşılaşmanın yekun hesabını müəyyənləşdirib.

Beləliklə, Polşa Rumıniyanı 6:0 hesabı ilə məğlub edib. Levandovskinin üç qolu gecənin ən diqqətçəkən fərdi göstəricilərindən biri olub.

Fransa 1:1 İtaliya

Gecənin ən çox maraq doğuran qarşılaşmalarından biri Fransada baş tutub. Fransa millisi İtaliya ilə üz-üzə gəlib.

Stad de Fransda keçirilən matçın ilk hissəsində hesab açılmayıb. Tərəflər ikinci hissədə daha fəal oynayıblar.

55-ci dəqiqədə Maykl Olise baxımlı zərbə ilə Fransa millisini hesabda önə keçirib. Lakin meydan sahiblərinin üstünlüyü uzun çəkməyib.

68-ci dəqiqədə Alessandro Bastoni İtaliyanın bərabərlik qolunu vurub. Bundan sonra hər iki komanda qələbə topunu axtarıb.

85-ci dəqiqədə Dayo Upamekano ikinci sarı vərəqə ilə meydandan qovulub və Fransa qarşılaşmanın son bölümünü azlıqda keçirib. Buna baxmayaraq, İtaliya üstünlükdən istifadə edərək ikinci qolu vura bilməyib.

Nəticədə komandalar 1:1 hesablı heç-heçə ilə kifayətləniblər. İtaliya qapıçısı Canluici Donnarummanın bir neçə mühüm seyvi də komandasının məğlubiyyətdən qaçmasında rol oynayıb.

Ukrayna 0:3 Şimali İrlandiya

B Liqasının diqqətçəkən nəticələrindən biri Ukrayna ilə Şimali İrlandiya arasındakı oyunda qeydə alınıb.

Şimali İrlandiya matçın əvvəlindən etibarən hesabı açmağa nail olub. 9-cu dəqiqədə Sayaron Braun fərqlənərək qonaqları önə keçirib.

22-ci dəqiqədə Ayzek Prays Şimali İrlandiyanın ikinci qolunu vurub. İlk hissə qonaqların 2:0 hesablı üstünlüyü ilə başa çatıb.

İkinci hissədə də Şimali İrlandiya üstün oyununu davam etdirib. 61-ci dəqiqədə yenidən Braun fərqlənərək özünün ikinci, komandasının isə üçüncü qolunu vurub.

Qalan dəqiqələrdə Ukrayna fərqi azaltmağa çalışsa da, Şimali İrlandiyanın müdafiəsini yarmaq mümkün olmayıb. Nəticədə qarşılaşma 3:0 hesabı ilə başa çatıb.

Macarıstan 1:0 Gürcüstan

Macarıstan öz meydanında Gürcüstanı minimal hesabla məğlub edib.

Matçın taleyini bir qol həll edib. 35-ci dəqiqədə Milos Kerkez dəqiq baş zərbəsi ilə Macarıstanı hesabda önə keçirib.

Qalan müddətdə Gürcüstan hesabı bərabərləşdirmək üçün imkanlar yaratsa da, Macarıstan müdafiəsi rəqibə qol vurmağa imkan verməyib.

Beləliklə, Macarıstan 1:0 hesablı qələbə qazanaraq vacib üç xal əldə edib. Kerkez üçün bu qol həm də milli komanda karyerasında ilk qol olub.

Bosniya və Herseqovina 1:1 İsveç

Bosniya və Herseqovina ilə İsveç arasında keçirilən görüş də heç-heçə ilə başa çatıb.

İlk hissədə qapılara qol vurulmayıb. İkinci hissədə isə İsveç hesabı açmağa müvəffəq olub.

61-ci dəqiqədə Viktor Gyökeres fərqlənərək qonaqları önə keçirib. Bosniya və Herseqovina isə matçın son bölümündə cavab qolunu tapıb.

80-ci dəqiqədə Kerim Alaybegoviçin vurduğu qol meydan sahiblərinə bərabərlik gətirib. Qarşılaşmanın qalan hissəsində başqa qol olmayıb və komandalar 1:1 hesablı heç-heçə ilə kifayətləniblər.

Farer Adaları 1:1 Slovakiya

C Liqasının oyununda Farer Adaları ilə Slovakiya üz-üzə gəlib.

Qarşılaşmada hesab 38-ci dəqiqədə açılıb. Farer adalarının müdafiəçisi Vatnhamar topu öz qapısına göndərərək Slovakiyanın hesabda önə çıxmasına səbəb olub.

Meydan sahibləri ikinci hissədə hesabı bərabərləşdirməyə nail olublar. 66-cı dəqiqədə Adrian Justinussen fərqlənərək komandasını məğlubiyyətdən xilas edib.

Qalan dəqiqələrdə tərəflərdən heç biri qələbə qolunu vura bilməyib və matç 1:1 hesabı ilə başa çatıb.

Beləliklə, Millətlər Liqasının növbəti oyun günündə Polşa və Şimali İrlandiya böyükhesablı qələbələri ilə diqqət çəkib, Fransa-İtaliya və Bosniya və Herseqovina-İsveç qarşılaşmaları isə heç-heçə ilə yekunlaşıb.

Turan ASLAN