Messi Argentina millisi ilə vidalaşdı: “Bu meydançadan getmək istəmirəm”
Argentina millisinin əfsanəvi futbolçusu Lionel Messi yığma komandadakı karyerasını başa vurarkən duyğusal nitq söyləyib.
Redaktor.az xəbər verir ki, Messi Argentina millisinin heyətində keçirdiyi 20 illik karyerasından, yaşadığı çətinliklərdən və milli komanda ilə qazandığı böyük uğurlardan danışıb.
Əfsanəvi futbolçu bildirib ki, bu komandaya təşəkkür etməkdən başqa artıq edəcəyi heç nəyin qalmadığını düşünür:
“20 il ərzində, hətta ən çətin anlarda belə, heç vaxt mübarizə aparmaqdan, dayanmadan irəliləməkdən, əlimdən gələni etməkdən və həmişə burada olmaq istəyindən əl çəkmədim.
Artıq Argentina milli komandasında oynamamaq çox ağrılı olacaq. Düzünü desəm, bütün həyatım boyu burada olmaq istəyərdim. Argentina üçün oynamaq var olan ən gözəl hissdir”.
Messi milli komandadan ayrılmaq vaxtının çatdığını da açıq şəkildə bildirib. O, sonuncu Dünya Kubokunun həm özü, həm də komanda üçün olduqca ağır keçdiyini söyləyib:
“Düşünürəm ki, artıq mənim üçün milli komandadan ayrılmağın vaxtı çatıb. Sonuncu Dünya Kuboku çox ağır idi, bütün yaşadıqlarım... Bizim mənim xəyalımı və bütöv bir ölkənin xəyalını gerçəkləşdirmək arzumuz var idi: yenidən dünya çempionu olmaq”.
Argentina millisinin kapitanı Dünya Kubokunda İngiltərəyə qarşı keçirilən oyunu da xatırlayıb. Onun sözlərinə görə, həmin qarşılaşma komandadan böyük güc tələb edib:
“Dünya Kubokunda İngiltərəyə qarşı oyunda bütün gücümüzü ortaya qoyduq. O oyun bizdən çox güc aldı.
Reallıq budur ki, 2026-cı il Dünya Kuboku da bizdən çox şey apardı. Amma həmişə etdiyimiz kimi sonuna qədər vuruşduq”.
Messi vida nitqinin sonunda isə azarkeşlərə müraciət edərək emosiyalarını gizlətməyib.
“Bu gün Argentina milli komandası ilə sağollaşarkən, karyeramın ən kədərli gününü yaşayıram. Hamınız üçün darıxacağam.
Bu meydançadan getmək istəmirəm. Bunun bitməsini istəmirəm. Sizin üçün darıxacağam, sizi sevirəm. Hər şey üçün təşəkkürlər!”
Beləliklə, Argentina millisinin formasını iki onillik ərzində daşıyan Messi milli komanda ilə keçirdiyi son matçdan sonra azarkeşlərə duyğusal sözlərlə vida edib.
Turan ASLAN
Bizi Telegram-da izləyin...
