"Sabah" - "Borussiya" oyunu Azərbaycan və Almaniya klublarının 14-cü matçı olacaq
UEFA Çempionlar Liqasının əsas mərhələsinin III turunda keçiriləcək "Sabah" - "Borussiya" (Dortmund) oyunu Azərbaycan və Almaniya təmsilçilərinin avrokuboklardakı 14-cü matçı olacaq.
Redaktor.az xəbər verir ki, indiyədək ölkə komandalarından "Qarabağ" və "Qəbələ" almanlara rəqib olublar.
Azərbaycan klublarının Almaniya təmsilçiləri ilə qarşılaşmalarında ən çox diqqət çəkən məqam Dortmund "Borussiya"sının bütün oyunlarda qələbə qazanmasıdır.
"Qarabağ" Dortmund təmsilçisi ilə 2010/2011 mövsümündə Avropa Liqasının pley-off mərhələsində qarşılaşıb. Ağdam klubu səfərdə 0:4, evdə isə 0:1 hesabı ilə uduzub. "Qəbələ" də 2015/2016 mövsümündə eyni rəqibə məğlub olub – evdə 1:3, səfərdə 0:4. Beləliklə, Dortmund "Borussiya"sı Azərbaycan klublarına qarşı keçirdiyi 4 oyunun hamısında qalib gəlib, 12 qol vurub və cəmi 1 top buraxıb.
"Qarabağ" Frankfurt "Ayntraxt"ı ilə də iki dəfə üz-üzə gəlib. Ağdam təmsilçisi 2013/2014 mövsümündə rəqibinə 0:2 və 1:2 hesabları ilə uduzub. Lakin 2025/2026 mövsümündə Çempionlar Liqasının əsas mərhələsində keçirilən qarşılaşmada "Qarabağ" 3:2 hesabı ilə qalib gələrək Almaniya klubları üzərində ilk və yeganə zəfərini qazanıb.
Ağdam təmsilçisi "Frayburq"la 2022/2023 mövsümündə Avropa Liqasının qrup mərhələsində mübarizə aparıb. Səfərdə 1:2 hesabı ilə uduzan "Qarabağ" Bakıda 1:1 hesablı heç-heçəyə nail olub.
Nəhayət, "Qarabağ"ın "Bayer 04"lə qarşılaşmaları 2023/2024 mövsümünə təsadüf edib. Avropa Liqasının qrup mərhələsində rəqib 5:1 və 1:0 hesablı qələbələr qazanıb. 1/8 final mərhələsində isə Bakıdakı oyun 2:2 hesabı ilə başa çatıb, Leverkuzen görüşündə meydan sahibləri 3:2 hesablı üstünlük əldə ediblər.
Beləliklə, Azərbaycan klubları Almaniya komandaları ilə 13 dəfə karşılaşıblar. Bu matçların 1-də qələbə qazanılıb, 2 heç-heçə qeydə alınıb və 10 məğlubiyyət yaşanıb. Təmsilçilərimiz vurulan 12 qola qarşı qapılarında 32 top görüblər.
Xatırladaq ki, sabah Bakı Olimpiya Stadionunda keçiriləcək "Sabah" - "Borussiya" oyunu saat 20:45-də start götürəcək.
Bizi Telegram-da izləyin...
